Halkara ulag maslahaty we sergisi geçirilýär
Halkara ulag maslahaty we sergisi geçirilýär
Türkmen Halkynyň Milli Lideri Gahryman Arkadagymyzyň öňdengörüjilikli başlangyçlary bilen Arkadagly Serdarymyzyň baştutanlygynda halkara logistika merkezine öwrülen ýurdumyzda täze awtomobil we demir ýollary, howa menzilleri, köprüler gurlup, Beýik Ýüpek ýoly täzeden dikeldilýär. Soňky ýyllarda ýurdumyz ulag we logistika babatda hyzmatdaşlygy saklamakda ýokary üstünlikleri gazandy. Şu maksatlardan ugur alyp, 2023-nji ýylyň 3-nji we 4-nji maýy aralygynda «Halkara ulag-üstaşyr geçelgeleri: özara arabaglanyşyk we ösüş – 2023» atly halkara maslahaty we sergisi guralýar.
«Türkmenistanyň Prezidentiniň ulag diplomatiýasyny ösdürmegiň 2022-2025-nji ýyllar üçin Maksatnamasynyň» çäklerinde bu halkara maslahatyna halkara guramalaryň, ýerli we daşary ýurt döwlet we hususy kompaniýalaryň wekilleriniň 800-den gowragy gatnaşar. Bu çärede logistika arkaly söwdany artdyrmagyň mümkinçilikleri, dünýä ykdysadyýetinde ulag we logistikanyň özara arabaglanyşygy, söwdany we logistikany sanlylaşdyrmak, poçta hyzmatlarynyň döwrebap ugurlary, ulag we logistika infrastrukturasynyň baglanyşygyny ösdürmekde döwlet-hususy hyzmatdaşlygynyň orny şeýle hem sanly söwda we logistikany ösdürmekde ylymyň we bilimiň orny ýaly meseleleri ara alyp maslahatlaşmakda iň soňky täze tejribelerini öwrenmek, şeýle hem infrastrukturany ösdürmäge ýardam berýän öňdebaryjy tehnologiýalar we innowasiýalar bilen tanyşmak üçin ajaýyp mümkinçilik bolar.
Halkara maslahatynda şu aşakdaky ugurlar boýunça mejlisler geçirilýär.
1. Plenar mejlisi : Halkara ulag we logistika: çagyryşlar we mümkinçilikler;
2. Häzirki zaman ykdysadyýetiniň ulag-logistiki taýdan özara baglanyşygy;
3. Söwdada we logistikada sanlylaşdyrma boýunça iň täze çemeleşmeler;
4. Söwda we senagat: ösüş we hyzmatdaşlyk;
5. Ulag we logistika infrastrukturasynyň baglanyşygyny ösdürmekde döwlet-hususy hyzmatdaşlygyň orny;
6. Ulag we logistika pudagynda innowasiýa tehnologiýalary, ylym we bilim - geljege nazar.
Bu barada şu ýerde hem okap bilersiňiz:
https://ashgabat.in/2023/05/04/mezhdunarodnaya-transportnaya-konferenciya-i-vystavka/
https://newashgabat.com/?p=18641