Halkara terjimeçiler güni mynasybetli bäsleşik
2021-nji ýylyň 30-njy sentýabrynda Türkmenistanyň Daşary işler ministrliginiň Halkara gatnaşyklary institutynda Halkara terjimeçiler güni mynasybetli Dünýä dilleri kafedrasynyň “Lingvo World” gurnagynyň guramagynda institutynyň ähli fakultetleriniň talyplarynyň arasynda zehin bäsleşigi geçirildi. Bäsleşik iňlis dilinde geçirilip, onda her fakultetden bir topar çykyş etdi. Bäsleşigiň dowamynda toparlar krosswordlary çözmek, soraglara jogap bermek we hormatly Prezidentimiziň “Parahatçylyk sazy, dostluk, doganlyk sazy” atly kitabyndan bir bölek terjime etmek ýaly dürli şertler boýunça bäsleşdiler.
Bäsleşigiň esasy maksady talyplaryň daşary ýurt dillerini kämilleşdirmek we terjime etmek endiklerini ýokarlandyrmak, şeýle hem medeniýet baradaky bilimlerini giňeltmekden we BMG-niň Baş Assambleýasynyň Karary esasynda her ýylyň 30-njy sentýabrynda bellenilýän Halkara terjimeçiler gününiň ähmiýetini düşündirmekden ybaratdyr. Şu nukdaýnazardan, dünýä dilleri kafedrasynyň mugallymlaryndan düzülen emin agzalary ýeňijileri yglan etmekde öran adalatly çemeleşdiler. Netijede, I orna Halkara gatnaşyklary fakultetiniň topary, II orna Halkara žurnalistikasy fakultetiniň topary, III orna Halkara hukuk fakulteti we IV orna halkara ykdysady gatnaşyklary fakultetiniň topary mynasyp boldy.
Bäsleşigiň ahyrynda oňa gatnaşyjylar institutyň mugallymlarynyň we talyplarynyň adyndan ýurdumyzyň ähli terjimeçilerini we bäsleşigiň ýeňijilerini Halkara terjimeçiler güni bilen gutladylar. Dünýä dillerini öwrenmäge mümkinçilik döreden Gahryman Arkadagymyza alkyş sözlerini aýtdylar.
Gülbahar ÖWEZNIÝAZOWA,
Türkmenistanyň Daşary işler ministrliginiň
Halkara gatnaşyklary institutynyň
Halkara gatnaşyklari fakultetiniň II ýyl talyby.