Halkara Sowatlylyk güni
Durmuşymyzy has aňsat we gyzykly hala öwürýän okap we ýazyp bilmeklik ukyby hemmeler üçin möhümdir. Şeýle ýagdaýy göz öňüne getiriň, daşary ýurda syýahat etmäge ýola rowana bolduňyz, emma barýan ýurduňyzyň dilini bilmeýärsiňiz. Resminamalar, görkezmeler ýa-da şuňa meňzeş işleri ýerine ýetirmekde müşgillik çekersiňiz. Bu sowatsyz adam üçin bolup biljek waka. Çünki okap hem-de ýazyp bilmän, biz gündelik işlerimizi ýerine ýetirmekde kynçylyklara duş gelip bileris. Bulara görä, bisowatlylyk bütin dünýäde möhüm meseleleriň hatarynda durýar. Bu pudakda zähmet çekýän adamlaryň ägirt uly tagallalaryny hormatlamak maksady bilen, her ýylyň 8-nji sentýabrynda Halkara Sowatlylyk güni bellenilýär.
1966-njy ýylyň 26-njy oktýabrynda ÝUNESKO-nyň umumy konferensiýasynyň 14-nji mejlisinde Halkara Sowatlylyk güni ady agzalan gurama tarapyndan kabul edildi we bu sene ilkinji gezek 1967-nji ýylda bellenilip başlandy. Bu halkara güni şahsyýetiň we umumy jemgyýetiň sowatlylygynyň ähmiýetini görkezmek we dünýäde, takmynan, 770 million ilata täsir edýän sowatlylyk meselesini örboýuna galdyrmak maksady bilen kabul edildi. Şunlukda, bilimi ýokarlandyrmak we bütin dünýäde sowatsyzlyk derejesini peseltmek üçin, global zerurlyk kesgitlenildi. Häzirki wagtda dünýä ilatynyň, ortaça, 14 göterimi — kämillik ýaşyna ýetenleriň bäşden biri sowatsyzlygyny hasaplamalar görkezdi. Ýeri gelende bellesek, 61 million töweregi çaga mekdebe gatnamaýar we 260 million çagada esasy sowat başarnyklary ýok.
ÝUNESKO her ýylyň 8-nji sentýabrynda Fransiýanyň paýtagty Pariž şäherinde bütin dünýäde sowatlylygy ýokarlandyrmak üçin has köp işleri bitiren şahsyýetlere we guramalara baýrak gowşurylyş dabarasyny geçirýär.
Biziň her birimiz ýaşlara okamagy öwretmek, kitaba bolan söýgini oýarmak we bilime höweslendirmek ýaly birnäçe ugurlar boýunça sowatlylygy ýokarlandyryp bileris. Şulara görä, geliň, bilelikde sowatsyzlygy azaltmak we sowatly şahsyýetleri kemala getirmek üçin zähmetimizi, gujur-gaýratymyzy gaýgyrmalyň!
Berdigylyç ÝAZMYRADOW,
Türkmenistanyň Daşary işler ministrliginiň
Halkara gatnaşyklary we institutynyň
Halkara žurnalistikasy fakultetiniň I ýyl talyby.