Halkara onlaýn wiktorinanyň ýeňijileri sylaglanyldy
2024-nji ýylyň 12-nji iýunynda — Ylymlar gününde Magtymguly adyndaky Türkmen döwlet uniwersitetinde Türkmenistanyň Daşary işler, Bilim we Medeniýet ministrlikleriniň, Telewideniýe, radiogepleşikler we kinematografiýa baradaky döwlet komitetiniň hem-de Magtymguly adyndaky Ýaşlar guramasynyň Merkezi geňeşiniň bilelikde guramagynda geçirilen «Magtymguly diýip adym tutsalar...» atly halkara onlaýn wiktorinanyň ýeňijilerini sylaglamak dabarasy boldy. Oňa ýokary okuw mekdepleriniň rektorlary, jemgyýetçilik guramalarynyň hem-de köpçülikleýin habar beriş serişdeleriniň wekilleri, professor-mugallymlar, talyp ýaşlar gatnaşdylar.
Mälim bolşy ýaly, Magtymguly Pyragynyň doglan gününiň 300 ýyllygy mynasybetli yglan edilen halkara onlaýn wiktorina akyldar şahyrymyzyň ömrüne we dünýä medeniýetiniň baý genji-hazynasyna öwrülen döredijiligine bagyşlandy. Wiktorina gatnaşmak üçin ýurdumyzyň hem-de daşary ýurtlaryň ýokary okuw mekdeplerinde bilim alýan talyplaryň 500-den gowragy hasaba alyndy.
Degişli düzgünnama laýyklykda, wiktorina akyldar şahyrymyzyň döredijiliginiň özboluşly şahyrana we baý edebi mirasynyň gadyr-gymmaty hem-de daşary ýurtly tanymal ýazyjy-şahyrlaryň Magtymguly Pyragy barada aýdanlary, şeýle hem beýik akyldaryň öňe süren umumadamzat ähmiýetli ynsanperwer ýörelgeleri barada ýazan goşgulary, terbiýeçilik ähmiýetli öwüt-nesihatlary bilen baglanyşykly 3 dilde (türkmen, rus we iňlis) taýýarlanan test sowallary esasynda geçirildi. Ýeňijiler jogaplaryň dogrulygyna hem-de testi çözmek üçin sarp eden wagtyna görä kesgitlenildi. Şeýlelikde, oňa gatnaşyjylaryň 35-si ýeňiji diýlip ykrar edildi. Olaryň 6-sy daşary ýurtlaryň ýokary okuw mekdepleriniň talyplarydyr.
Halkara onlaýn wiktorinada Türkmenistanyň Daşary işler ministrliginiň Halkara gatnaşyklary institutynyň talyplary iň ýokary netije görkezdiler. Şunuň bilen baglylykda, türkmen diplomatiýasynyň milli mekdebiniň talyplarynyň 6-sy — Halkara žurnalistikasy fakultetiniň talyplary: Mätgurban Mätgurbanow, Jahantäç Öwezowa, Batyrmuhammet Orazow, Dünýägözel Çaryýewa, şeýle hem Halkara gatnaşyklary fakultetiniň talyplary: Serdar Rahymow, Şyhdurdy Şyhyýew dagylar ýeňiji bolmagy başardylar. Ýeňijilere Hormat hatlary hem-de gymmat bahaly sowgatlar dabaraly ýagdaýda gowşuryldy.
Atamyrat ÝAZWELIÝEW,
Türkmenistanyň Daşary işler ministrliginiň
Halkara gatnaşyklary institutynyň
Halkara žurnalistikasy fakultetiniň II ýyl talyby.