Halkara hokkeý ýaryşy – türkmen sportunyň taryhynda täze sahypa
15-nji aprelde sagdynlygyň we ruhubelentligiň mekany bolan ýurdumyz nobatdaky iri sport baýramçylygyna – hokkeý boýunça halkara ýaryşyna badalga berdi. Saglyk aýynyň dowam edýän günlerinde ak mermerli Aşgabat tejribeli türgenleri, sport janköýerlerini öz goýnunda jemledi. 20-nji aprele çenli dowam etjek bu halkara ýaryş Gyşky oýunlar sport toplumynyň uly we kiçi buzly meýdançalarynda, “A” we “B” toparçalarda yzygiderli geçirilýär.
Halkara ýaryşyň badalga alan ilkinji günlerinde geçirilen duşuşyklar turuwbaşdan ýaryşyň şowhunyny artdyrdy. 16-njy aprelde ikinji tapgyryň oýunlaryna Türkmenistanyň Daşary işler ministrliginiň Halkara gatnaşyklary institutynyň mugallymlarydyr talyp ýaşlary janköýerlik edip, milli ýygyndymyza ruhy goldaw bermäge gatnaşdylar.
Günüň birinji ýarymynda Türkmenistanyň “Galkan” topary bilen Oman Patyşalygynyň “Oman Nationals” toparynyň arasynda geçirilen oýunlarda toparlar buzuň üstündäki başarnyklaryny, şaýba erk etmek ussatlyklaryny görkezdiler. Duşuşykda türkmen hokkeýçileri 15:1 hasabynda garşydaşlaryny ynamly ýeňmegi başardylar.
Günüň ikinji ýarymynda Eýranyň “Ice box” topary bilen Bahreýn Patyşalygynyň “Bahreýn” topary duşuşyp, 8:1 hasabynda Eýranyň “Ice box” topary garşydaşlaryny ynamly ýeňmegi başardylar.
Türkmen sportunyň taryhyna täze bir ajaýyp sahypa bolup ýazyljak hokkeý boýunça halkara ýaryşyna Ýewropa we Aziýa yklymlarynyň on ýurdundan toparlar gatnaşýarlar. Giň gerim bilen badalga alan bu sport baýramçylygy sebitde hokkeýiň ösmegine, bu sportuň meşhurlygyna we oňa gatnaşyjy ýurtlaryň arasynda dostlukly gatnaşyklaryň has-da pugtalanmagyna mynasyp goşantdyr.
Aýşirin DÖWLETOWA,
Türkmenistanyň Daşary işler ministrliginiň
Halkara gatnaşyklary institutynyň
Halkara žurnalistikasy fakultetiniň
II ýyl talyby.