![«Halkara gatnaşyklary: parahatçylyk dialogynyň medeniýeti» atly halkara bäsleşik surady](https://iirmfa.edu.tm/images/posts/Halkara bäsleşik albom — tassyklanan_02_1713848326.webp)
16/03/2024
4896
«Halkara gatnaşyklary: parahatçylyk dialogynyň medeniýeti» atly halkara bäsleşik
Türkmenistanyň Bilim ministrliginiň hem-de Türkmenistanyň Daşary işler ministrliginiň Halkara gatnaşyklary institutynyň bilelikde gurnamagynda Merkezi Aziýa, Hazarýaka, Türkiýe hem-de Hytaý Halk Respublikalarynyň ýokary okuw mekdepleriniň talyplarynyň arasynda geçiriljek
«Halkara gatnaşyklary: parahatçylyk dialogynyň medeniýeti»
atly halkara bäsleşigini geçirmegiň
DÜZGÜNNAMASY
Şu Düzgünnama Türkmenistanyň Bilim ministrliginiň hem-de Türkmenistanyň Daşary işler ministrliginiň Halkara gatnaşyklary institutynyň bilelikde gurnamagynda Merkezi Aziýa, Hazarýaka, Türkiýe hem-de Hytaý Halk Respublikalarynyň ýokary okuw mekdepleriniň talyplarynyň arasynda geçiriljek «Halkara gatnaşyklary: parahatçylyk dialogynyň medeniýeti» atly halkara bäsleşigini guramagyň we geçirmegiň kadalaşdyryjy resminamasy bolup, bu bäsleşigi geçirmegiň düzgünlerini kesgitleýär.
Bäsleşigiň esasy maksady talyplaryň halkara gatnaşyklary ugrundan bilimleri boýunça bilim bäsleşigi esasynda zehin başarnyklaryny ýüze çykarmakdan, degişli sebitleriň talyp ýaşlarynyň arasynda dostlukly gatnaşyklaryny berkitmekden, okuw-bilim tejribeligini alyşmaga ýardam bermekden, ylym-bilimleri özara bähbitli alyş-çalyş etmekden, häzirki zamanda ýüze çykýan ylmy we amaly meseleleri çözmäge ukyply ýaş hünärmenleri taýýarlamakdan, ýurdumyzyň we daşary ýurtlaryň ýokary okuw mekdepleriniň arasynda özara bähbitli gatnaşyklary ýola goýmakdan we berkitmekden, Bitarap Türkmenistanyň medeni we bilim diplomatiýasyny wagyz etmekden ybarat.
Bäsleşigiň geçiriljek ýeri: Türkmenistanyň Daşary işler ministrliginiň Halkara gatnaşyklary instituty.
Bäsleşige Merkezi Aziýa, Hazarýaka, Türkiýe hem-de Hytaý Halk Respublikalaryndan gatnaşýan her ýokary okuw mekdepden bir mugallymyň ýolbaşçylygy astynda 3 (üç) talyp gatnaşyp biler. Türkmenistanyň her ýokary okuw mekdebinden Bäsleşige bir mugallymyň ýolbaşçylygynda 1-12 aralygynda talyp gatnaşyp biler.
Bu bäsleşigiň ýokary guramaçylykly geçirilmegi üçin Guramaçylyk komiteti döredilýär. Guramaçylyk komitetiniň düzümi Türkmenistanyň Bilim ministri bilen ylalaşyp, Türkmenistanyň Daşary işler ministrliginiň Halkara gatnaşyklary institutynyň rektorynyň buýrugy bilen tassyklanylýar.
Guramaçylyk komiteti:
- bu bäsleşigi geçirmegiň esasy ýörelgelerini kesgitleýär;
- bäsleşigi guramak we geçirmek boýunça guramaçylyk işlerini alyp barýar;
- bäsleşigi geçirmegiň tertibini we möhletini kesgitlemek boýunça teklipleri taýýarlaýar;
- ýurdumyzyň we daşary ýurtlaryň ýokary okuw mekdepleriniň wekilleri bilen bäsleşiginiň meselelerini taýýarlamak boýunça işleri alyp barýar;
- daşary ýurtdan gelen gatnaşyjylaryň şäherdäki myhmanhanalarda bolmaklary, iýmit, ulag bilen üpjün edilmegini gurnaýar;
- daşary ýurtly myhmanlar üçin medeni, dynç alyş, tanyşdyryş çärelerini gurnaýar;
- ýeňijileri sylaglandyrmak, medallar, Diplomlar, Hormat hatlary we sowgatlar bilen üpjün etmek işlerini amala aşyrýar.
Daşary ýurtly talyplar we topar ýolbaşçysy bäsleşigiň dowamynda institutyň umumy ýaşaýyş jaýynda ýaşan ýagdaýlarynda olaryň ýaşaýyş üçin çykdajylaryny we institutyň naharhanasynda naharlar hem-de ulag bilen üpjün edilmegini Türkmenistanyň Daşary işler ministrliginiň Halkara gatnaşyklary instituty öz üstüne alýar. Guramaçy tarap daşary ýurtly gatnaşyjylaryň wiza almak bilen bagly çykdajylarynyň ýeňilleşdirilmegine kömek eder. Daşary ýurtly gatnaşyjylaryň Aşgabada gelmek we gitmek bilen bagly ýol petekleri üçin töleg we başga ýüze çykyp biljek çykdajylaryny gatnaşyjy tarap çekýär.
Bäsleşik şahsy we toparlaýyn bäsleşikler görnüşinde geçiriler. Her topardaky talyp sany 1-6 aralygynda bolup biler.
Bäsleşigi geçirmegiň Eminler toparyna gatnaşyjy toparlaryň ýolbaşçylary, Türkmenistanyň we daşary ýurtlaryň ylym we bilim edaralarynyň wekilleri giriziler. Eminler toparynyň düzümi we onuň ýolbaşçysy Türkmenistanyň Daşary işler ministrliginiň Halkara gatnaşyklary institutynyň rektorynyň buýrugy bilen tassyklanylýar. Eminler topary Bäsleşigiň ýeňijilerini kesgitleýär, ýüze çykýan meselelere we arz-şikaýatlara seredýär.
Bäsleşigiň şahsy we toparlaýyn tapgyrdaky ýeňijileri altyn, kümüş we bürünç medallar, degişlilikde 1-nji, 2-nji we 3-nji derejeli Diplomlar, Hormat hatlary we sowgatlar bilen sylaglanylar. Ýeňijileriň sany gatnaşyjylaryň 50%-inden geçmeli däldir hem-de 1-nji, 2-nji, 3-nji ýerler 10%:15%:25% gatnaşykda bolmalydyrlar.
Bäsleşik gatnaşyjy toparlaryň ýolbaşçylary öz meselelerini we ýumuşlaryny olaryň doly çözüwleri bilen bilelikde Guramaçylyk toparyna Bäsleşigiň geçirilmeginden 14 gün öňünden gijä galman teklip edip bilerler.
Bäsleşikde serediljek we çözülmäge teklip ediljek meseleleriň deslapky düzümi aşakdakylardan ybarat:
* halkara gatnaşyklarynda parahatçylykly dialogyň häzirkizaman ugurlary we usullary;
* parahatçylygy döretmekde bitaraplyk syýasatynyň täsiriniň artmagy;
* medeni diplomatiýanyň netijeli ugurlary we onuň halkara hyzmatdaşlygyny ösdürmekdäki täsiriniň artmagy;
* durnukly ösüşi modelirlemekde matematiki usullaryň täze ugurlary;
* halkara gepleşiklerini modelirlemek;
* halkara ykdysady gatnaşyklaryny öwrenmekde maglumat tehnologiýalaryny ulanmak;
* halkara ulag logistikasynyň global trendlerini öwrenmek;
halkara gatnaşyklarynda optimal çözüwleri kabul etmekde matematiki modelirlemegi ulanmak;
* sebit hyzmatdaşlygynyň täze we derwaýys ugurlaryny teklip etmek.
Bäsleşigi 2024-nji ýylyň 22-25-nji maýy aralygynda geçirmek meýilleşdirilýär.
Bäsleşigiň resmi dilleri: türkmen, rus we iňlis dilleridir.
Bäsleşik barada goşmaça maglumatlar Türkmenistanyň Daşary işler ministrliginiň Halkara gatnaşyklary institutynyň saýtynda goýlar.
Bu barada şu ýerde hem okap bilersiňiz:
Soňky täzelikler
![DALAŞGÄRLERIŇ DYKGATYNA! surady](https://iirmfa.edu.tm/images/posts/1721025472140967493-1000_1721045414.webp)
15/07/2024
DALAŞGÄRLERIŇ DYKGATYNA!