«Halkara gatnaşyklary: parahatçylyk dialogynyň medeniýeti» atly halkara bäsleşiginiň jemlerine bagyşlanan hoşallyk maslahaty
2024-nji 27-nji maýynda Türkmenistanyň Daşary işler ministrliginiň Halkara gatnaşyklary institutynda Türkmenistanyň Bilim ministrliginiň hem-de Türkmenistanyň Daşary işler ministrliginiň Halkara gatnaşyklary institutynyň bilelikde gurnamagynda Merkezi Aziýa we Hazarýaka ýurtlarynyň, Türkiýe we Hytaý Halk Respublikasynyň ýokary okuw mekdepleriniň talyplarynyň arasynda 2024-nji ýylyň 23 – 25-nji maýy aralygynda geçirilen «Halkara gatnaşyklary: parahatçylyk dialogynyň medeniýeti» atly halkara bäsleşiginiň netijeleri boýunça hoşallyk maslahaty geçirildi.
Maslahata institutyň professor-mugallymlary, halypa diplomatlar we talyp ýaşlar gatnaşdylar. Hoşallyk maslahatynda institutyň okuw ileri boýunça prorektory Gülşat Ýusupowanyň, institutyň Halkara gatnaşyklary we diplomatiýa kafedrasynyň professory, sosiologiýa ylymlarynyň doktory Öwezdurdy Muhammetberdiýewiň, Halkara ykdysady gatnaşyklary kafedrasynyň uly mugallymy, fizika-matematika ylymlarynyň kandidaty, halkara bäsleşigiň mandat toparynyň başlygy Gaplaň Esenamanowyň, Halkara ykdysady gatnaşyklary kafedrasynyň uly mugallymy Perhat Çaryýewiň, şeýle-de institutdan bäsleşige gatnaşyp ýeňiji bolan Halkara gatnaşyklary fakultetiniň 4-nji ýyl talyby Akgözel Rasulowanyň, Halkara ykdysady gatnaşyklary fakultetiniň 1-nji ýyl talyby Bägül Hudaýberdiýewanyň çykyşlary we ýürek buýsançlary diňlenildi.
Çykyş edenleriň ählisi türkmen diplomatiýasynyň milli mekdebinde halkara derejesinde geçirilen ilkinji bäsleşigiň talyp ýaşlarda we mugallymlarda uly täsir galdyrandygyny belläp geçdiler.
«Halkara gatnaşyklary: parahatçylyk dialogynyň medeniýeti» atly halkara bäsleşigiň şahsy tapgyrynyň netijelerine görä, gatnaşyjylar 21 altyn, 36 kümüş we 46 bürünç medal gazandylar. Şol sanda türkmen diplomatiýasynyň milli mekdebiniň talyplary 3 altyn we 8 kümüş medala mynasyp boldular. Şeýle-de halkara bäsleşigiň toparlaýyn tapgyrynda 3 topar altyn, 5 topar kümüş we 8 topar bürünç medal gazandylar. Ýeri gelende aýtsak, toparlaýyn tapgyrda TDIM-iň Halkara gatnaşyklary institutynyň talyplaryndan düzülen 2 topar altyn medala mynasyp boldy.
Maslahatyň ahyrynda halkara bäsleşikde üstünlik gazanan institutymyzyň talyp ýaşlaryny tüýs ýürekden gutladylar we ýaşlar hyzmatdaşlygyny ösdürmekde ýetilen sepgitler üçin Gahryman Arkadagymyzyň, Arkadagly Gahryman Serdarymyzyň adyna Ýüzlenme kabul etdiler.
Gyzylgül GURBANMUHAMEDOWA,
Türkmenistanyň Daşary işler ministrliginiň
Halkara gatnaşyklary institutynyň mugallymy.