«Halkara gatnaşyklary: parahatçylyk dialogynyň medeniýeti» atly halkara bäsleşigine gatnaşyjylara hödürleniljek test we ýumuşlar, geçiriljek breýn-ring boýunça gysgaça MAGLUMAT
Türkmenistanyň Bilim ministrliginiň we Türkmenistanyň Daşary işler ministrliginiň Halkara gatnaşyklary institutynyň bilelikde gurnamagynda 2024-nji ýylyň 22-25-nji maýy aralygynda Aşgabat şäherinde Merkezi Aziýa, Hazarýaka ýurtlarynyň, Türkiýe Respublikasynyň we Hytaý Halk Respublikasynyň ýokary okuw mekdepleriniň talyplarynyň we magistrantlarynyň arasynda
«Halkara gatnaşyklary: parahatçylyk dialogynyň medeniýeti»
atly halkara bäsleşiginde gatnaşyjylara hödürleniljek test we ýumuşlar,
geçiriljek breýn-ring boýunça gysgaça
MAGLUMAT
1. 2024-nji ýylyň 23-nji maýynda sagat 11:00-12:00 aralygynda Halkara bäsleşigiň şahsy tapgyrynda test geçiriler.
Testde 30 sorag bolar, jemi berilýän ballaryň möçberi 50 bal.
Test soraglary sebit we halkara gatnaşyklary, olaryň syýasy-diplomatiki, söwda-ykdysady, taryhy-medeni we beýleki derwaýys ugurlaryny öz içine alar.
Has takygy, test soraglary aşakdaky ugurlary we meseleleri şöhlelendirer:
- Garaşsyz we Bitarap Türkmenistanyň wajyp başlangyçlarynyň ähmiýeti we mazmuny;
- BMG-niň Baş Assambleýasynyň 78-nji mejlisinde Türkmenistanyň başlangyjy boýunça kabul edilen «2025-nji ýyl – Halkara parahatçylyk we ynanyşmak ýyly» atly Kararnamasynyň durmuşa geçirilmegine goňşy we sebit ýurtlarynyň ýaşlarynyň halkara derejesinde giňden gatnaşmagy;
- Sebit parahatçylygy ugrunda dialogy hem-de hyzmatdaşlygy netijeli ýola goýmak üçin halkara gün tertibiniň derwaýys meseleleri;
- halkara gatnaşyklarynda parahatçylykly dialogyň häzirkizaman ugurlary we usullary;
- parahatçylygy döretmekde bitaraplyk syýasatynyň täsiri;
- medeni diplomatiýanyň netijeli ugurlary we onuň halkara hyzmatdaşlygyny ösdürmekdäki täsiri;
- sebit hyzmatdaşlygynyň täze we derwaýys ugurlary.
2. 2024-nji ýylyň 23-nji maýynda sagat 14:00-18:00 aralygynda Halkara bäsleşigiň şahsy tapgyrynda ýumuşlary we meseleleri çözmek.
Ýumuşlar we meseleler halkara gatnaşyklarynda matematiki usullary ulanmak, matematiki modelirlemek, ekonometrika, logistika we ş.m. ugurlardan bolar. Meseleleriň mazmuny durnukly ösüşi modelirlemekde matematiki usullaryň täze ugurlary, halkara gepleşiklerini modelirlemek, halkara ykdysady gatnaşyklaryny öwrenmekde maglumat tehnologiýalaryny ulanmak, halkara ulag logistikasynyň global trendlerini öwrenmek, halkara gatnaşyklarynda optimal çözüwleri kabul etmekde matematikany we matematiki modelirlemegi ulanmak we ş.m. ugurlardan bolar.
Gatnaşyjylar 5 ýumuşdan ybarat ýazuw işini ýerine ýetirerler. Bu tapgyrda jemi beriljek ballar 50 bal bolar.
Şahsy bäsleşikde netijeler ýokarky iki tapgyryň jemi boýunça kesgitleniler.
3. 2024-nji ýylyň 24-nji maýynda sagat
9:00-11:00 aralygynda Halkara bäsleşigiň toparlaýyn tapgyrynda ýumuşlary we meseleleri çözmek.
Bu tapgyryň dowamynda gatnaşyjylar toparlaýyn bäsleşikde halkara gatnaşyklarynda matematiki usullary ulanmak, matematiki modelirlemek, ekonometrika, logistika we ş.m. ugurlar boýunça 5-10 sany mesele-ýumuş çözerler.
Bu tapgyrda toparlar boýunça ýeňijiler bahalandyrylar.
4. 2024-nji ýylyň 24-nji maýynda sagat 11:00-13:00 aralygynda Halkara bäsleşigiň gatnaşyjylaryň bilelikdäki «paýhas hüjümi» (brainstorm, мозговой штурм, beyin fırtınası, ایده پردازی, 头脑风暴 - Tóunǎo fēngbào).
Bu çäre akyl-paýhas hyzmatdaşlygy formatynda bolar, onda 1 sagat 30 minut diskussiýa, jemleýji teklibi taýýarlamak, ylalaşmak we gutarnykly görnüşde hödürlemek üçin goşmaça 30 minut göz öňünde tutulýar.
Bu tapgyryň esasy wezipesi halkara we sebit ýagdaýlarynyň derwaýys meselesini seljermek netijesinde, halkara subýektleriniň arasynda optimal dialog we hyzmatdaşlyk usullaryny hem-de olaryň görnüşlerini bilelikde hödürlemek bolup durýar.
Bu tapgyrda ýeňijiler kesgitlenmeýär. Diskussiýa işeňňir gatnaşyjylar, Jemleýji teklibiň mazmunynda pikirleri we teklipleri giňden şöhlelendirilen toparlar ýa-da gatnaşyjylar aýratyn bellenilip geçiler.