Halkara çaý güni
Her ýylyň 21-nji maýynda BMG-niň Baş Assambleýasynyň 2019-njy ýylyň dekabr aýynda kabul eden karary esasynda Halkara çaý güni bellenilýär.
Tutuş dünýä ýüzünde giňden tanalýan meşhur içgileriň biri hem çaý bolup, ol teşneligi, suwsuzlygy gandyrmakda bellidir. Çaý dünýäde ulanylyşy boýunça arassa suwdan soň ikinji orny eýeleýär. Çaý diňe bir suwsuzlygy ýa-da teşneligi gandyrmak bilen çäklenmän, ol sowuk şertlerde bedeniň içki temperaturasyny sazlaýjy, ýyladyjy häsiýeti üçin hem diýseň ýaramlydyr.
Çaý, esasan hem, çygly zolaklarda ösýän «Camellia sinesis» ösümliginden öndürilýär. Çaýyň watany Hytaýyň demirgazyk-gündogar bölegi hasaplanýar. Ol 5000 ýyl mundan ýüze çykypdyr diýlen ylmy maglumatlar bar. Günorta-gündogar Aziýa ýurtlarynda çaý medeniýetiň, durmuşyň aýrylmaz bölegi hasaplanýar. Dürli ýurtlarda çaýyň taýýarlanyşynyň dürli görnüşleri bolup, olaryň her biri-de ýakymly tagamy bilen bir-birinden tapawutlanýar.
Çaý halk lukmançylynda dürli keselleriň bire-bir emidir. Hindistan, Şri-Lanka, Birma, Hytaý, Ýaponiýa, Keniýa ýaly ýurtlar üçin bolsa çaý önümçiligi ykdysadyýetiň möhüm girdejili pudagy bolup durýar. Çaý öz ösýän ýeriniň klimatyna hem belli bir derejede oňaýly täsir edýär, ýakymly ys ýaýradyp ynsanyň göwnüni açýar hem-de töwerege gözellik paýlaýar. Ol bezeg maksady bilen hem ekilýär.
Akmuhammet BAÝLYÝEW,
Türkmenistanyň Daşary işler ministrliginiň
Halkara gatnaşyklary institutynyň
Halkara žurnalistikasy fakultetiniň III ýyl talyby.