HALKARA BAGTLYLYK GÜNI
Halkara bagtlylyk güni Birleşen Milletler Guramasy tarapyndan 2013-nji ýyldan bäri halkara derejede bellenilip gelinýän baýramdyr. Bu günüň çäginde baýramçylyk çäreleri we taslamalar Dalaý-Lamanyň ýolbaşçylygyndaky «Bagt üçin hereket» atly haýyr-sahawat hereketi bilen utgaşdyrylýar. Halkara bagtlylyk güni her ýyl 20-nji martda bellenilýär. 2012-nji ýylyň iýun aýynda BMG-niň bagt baradaky ilkinji maslahaty geçirildi. Gurama agza 193 döwlet dünýäde her ýyl 20-nji martda bagtlylyk gününi bellemek barada karar kabul etdiler. Karar Butan döwleti tarapyndan öňe sürüldi.
2014-nji ýylda bagtlylyk gününi guraýjylar adamlardan özleriniň bagtly pursatlaryny beýan edýän suratlaryny sosial ulgamlarda paýlaşmagyny haýyş etdiler. Her ýyl Halkara bagtlylyk gününde «Gallup World Poll» tarapyndan dürli ýurtlarda bagt derejesine baha berýän Bütindünýä bagtlylyk hasabaty çap edilýär. Maglumatlara laýyklykda, 2023-nji ýylda Finlýandiýa yzly-yzyna altynjy gezek iň bagtly ýurtlaryň sanawynda birinji bolmagy gazandy.
Mälim bolşy ýaly, parahatçylyk – islendik döwletiň we onuň raýatlarynyň ösüşini üpjün edýär. Diňe parahatçylygyň höküm süren ýurdunda raýatlar bagtly ýaşaýarlar. Elbetde, adamlar hakynda oňat alada edilýän ýerde halkyň hal-ýagdaýy hem oňat bolýar. Gahryman Arkadagymyzyň «Döwlet adam üçindir» diýen şygary esasynda durmuşa geçirýän işleri halkyň alkyşyna mynasyp bolýar. Şäherdir obalarda gurulýan durmuş maksatly binalar halkyň hyzmatynda.
Bu gün asuda asmanymyzda uçýan ak kepderiniň parahatçylygyň, bagtly durmuşyň nyşanydygy hemmämize-de mälimdir. Şeýle asuda, bagtyýar zamananyň sakasynda duran Gahryman Arkadagymyzyň, Arkadagly Gahryman Serdarymyzyň janlary sag, başlary dik bolsun! Ähli tutumlary hemişe rowaç alsyn!
Selim REJEPGELDIÝEW,
Türkmenistanyň Daşary işler ministrliginiň
Halkara gatnaşyklary institutynyň
Halkara ykdysady gatnaşyklary hünäriniň V ýyl talyby.