GÖNI WIDEOARAGATNAŞYK ARKALY DUŞUŞYK GEÇIRILDI
2025-nji ýylyň 21-nji oktýabrynda Türkmenistanyň Daşary işler ministrliginiň Halkara gatnaşyklary instituty bilen Iordaniýa Haşimit Patyşalygynyň Daşary işler we daşary ýurtlarda ýaşaýan iordaniýalylaryň işleri boýunça ministrliginiň Diplomatiýa institutynyň ýolbaşçylarynyň, professor-mugallymlarynyň gatnaşmagynda göni wideoaragatnaşyk arkaly duşuşyk geçirildi. Ol Türkmenistan bilen Iordaniýa Haşimit Patyşalygynyň arasynda diplomatik gatnaşyklaryň ýola goýulmagynyň 32 ýyllygyna bagyşlandy.
Duşuşyga institutyň rektory Gülşat Ýusupowa, Dünýä dilleri kafedrasynyň mugallymy Aýgözel Öwezowa we Halkara ykdysady gatnaşyklary kafedrasynyň mugallymy Nazar Meredow şeýle-de Iordaniýa Haşimit Patyşalygyndan Iordan Diplomatiýa institutynyň direktory – Iordaniýanyň Daşary işler ministrliginiň Ilçisi jenap Haifa Al-Hraişa, Doly ygtyýarly ministr jenap Başar Darwazeh we ministrligiň ikinji sekretary hanym Razan Alsaket dagy gatnaşdylar.
Duşuşygyň dowamynda taraplar Türkmenistan bilen Iordaniýanyň arasyndaky gatnaşyklaryň ýagdaýy, geçen 32 ýylyň dowamynda bitirilen işler, ýokary okuw mekdepleriň arasyndaky hyzmatdaşlygyň häzirki ýagdaýy we geljegi hem-de “Halkara parahatçylyk we ynanyşmak” ýyly diýlip atlandyrylan 2025-nji ýylda alnyp barylýan işler barada pikir alyşdylar.
Sahydöwlet HÜMMETJUMAÝEW,
Türkmenistanyň Daşary işler ministrliginiň
Halkara gatnaşyklary institutynyň
Halkara gatnaşyklary fakultetiniň III ýyl talyby.