Garaşsyzlyk binasyna guralan gezelenç
2022-nji ýylyň 19-njy maýynda Türkmenistanyň Daşary işler ministrliginiň Halkara gatnaşyklary institutynyň Ýaş diplomatlaryň mekdebiniň agzalary ýagny, «Parahatçylygyň ýaş çaparlary» akyl-paýhas bäsleşiginiň I saýlama tapgyrynyň 8-nji oýnuna gatnaşýan mekdep okuwçylary üçin gözel paýtagtymyzyň Garaşsyzlyk binasyna gezelenç guraldy. Gezelençde bu ýokary okuw jaýynyň mugallymlarynyň hem-de talyp ýaşlarynyň Baýram han Türkmeniň manyly ömri barada beren gyzykly gürrüňleri örän täsirli boldy. Institutyň mugallymlarynyň Beýik Mogollar döwletiniň ösmegine uly goşant goşan taryhy şahslaryň biri Muhammet Baýram han Türkmeniň edermenlikleri we onuň alyp baran daşary syýasaty baradaky beren ajaýyp gürrüňleri okuwçylarda uly täsir galdyrdy. Şeýle hem dünýä döwletleriniň taryhynda uly yz galdyran döwletleriň biri hökmünde Beýik Mogollar imperiýasynyň ösmegine saldamly goşant goşan şahsyň türkmen bolmagy biz – ýaşlary diýseň begendirdi. Häzirki wagtda Berkarar döwletiň täze eýýamynyň Galkynyşy döwründe hem taryhy ýadygärlikleri öwrenmäge uly mümkinçilikler döredilýär. Biz ýaşlara okamaga, öwrenmäge döredip berýän mümkinçilikleri üçin Gahryman Arkadagymyza, Arkadagly Serdarymyza çäksiz hoşallygymyzy bildirýäris.
Gülnara MYRADOWA,
Balkan welaýatynyň Meretgeldi Garaýew adyndaky
5-nji orta mekdebiniň okuwçysy.