GAHRYMAN ARKADAGYMYZYŇ AWTSRIÝA RESPUBLIKASYNA AMALA AŞYRAN SAPARYNYŇ JEMLERINE BAGYŞLANAN BRIFING
2026-njy ýylyň 12-nji aprelinde Türkmenistanyň Daşary işler ministrliginiň Halkara gatnaşyklary institutynda Gahryman Arkadagymyzyň Awtsriýa Respublikasyna saparynyň çäklerinde guralan çärelere bagyşlanyp, brifing geçirildi. Onda Türkmenistanyň Mejlisiniň deputaty, Halkara we parlamentara gatnaşyklar baradaky komitetiniň agzasy Enejan Ataýewa, «Neýtralnyý Türkmenistan» gazetiniň baş redaktory Maýýa Alimowa, Türkmenistanyň Magtymguly adyndaky Ýaşlar guramasynyň Merkezi Geňeşiniň Guramaçylyk bölüminiň müdiri Gurbanmyrat Muhammedow, hem-de şol guramanyň Arkadag şäher Geňeşiniň Guramaçylyk bölüminiň müdiri Umyda Kakaýewa, Türkmenistanyň Daşary işler ministrliginiň Halkara gatnaşyklary institutynyň uly mugallymy Perhat Çaryýew we Magtymguly adyndaky Türkmen döwlet uniwersitetiniň mugallymy Rahym Saparmyradow dagy çykyş etdiler. Şeýle-de oňa ýurdumyzyň žurnalistika ugurly ýokary okuw mekdepleriniň professor-mugallymlarydyr talyp ýaşlary sanly ulgam arkaly gatnaşdylar. Brifingde çykyş edenler Awstriýa Respublikasyna saparynyň çäklerinde türkmen halkynyň Milli Lideri, Türkmenistanyň Halk Maslahatynyň Başlygy Gahryman Arkadagymyzyň gatnaşmagynda energetika geçişini çaltlandyrmak, ýaşyl wodorody ornaşdyrmak we energetika ulgamyny sanlylaşdyrmak bilen baglanyşykly meselelerini özünde jemleýän Energetika we howa boýunça halkara Wena forumynyň ähmiýeti dogrusynda bellediler. Ylaýta-da, forumyň barşynda Gahryman Arkadagymyzyň energiýa serişdelerine erkin, durnukly we deňhukukly elýeterliligi üpjün etmäge çagyryp, birnäçe eden teklipleriniň ähmiýetini nygtap, bu boýunça öz pikir-garaýyşlaryny beýan etdiler.
Gahryman Arkadagymyz Awstriýa Respublikasyna saparynyň çäklerinde ýurdumyzyň köpçülikleýin habar beriş serişdeleriniň wekilleri bilen duşuşdy we olar bilen söhbetdeş boldy. Söhbetdeşlikde Milli Liderimiz Ýakyn Gündogarda bolup duran dartgynly ýagdaýlar boýunça türkmen milletiniň bu ýagdaýlar bilen bagly garaýşyny hem-de Türkmenistanyň soňky üç onýyllygyň dowamynda harby işjeňligi peseltmäge, daşary syýasatyň guraly hökmünde güýç ulanmak usullaryny aradan aýyrmaga gönükdirilen köptaraply tagallalara işjeň gatnaşyp gelýändigini nygtady. Şeýle hem serhetdeş hazarýaka döwletiniň çäklerine harby zarbalaryň urulmagyna garşydygyny belläp, ýaňy-ýakynda teklip edilen Hazarýaka döwletleriniň Bilelikdäki beýannamasynyň taslamasyna ünsi çekdi. Şeýlelikde, bu resminamada ýurdumyzyň düýpli garaýyşlary hem-de gapma-garşylygyň giňelmegini goldamaýandygy baradaky pikiriniň beýan edilýändigi aýratyn nygtaldy.
Brifingde talyp ýaşlar sebitde we dünýäde energiýa durnuklylygyny we ekologiýa howpsuzlygyny üpjün etmek bilen bagly özlerini gyzyklandyrýan sowallar bilen çykyş edenlere ýüzlendiler. Brifingiň ahyrynda oňa gatnaşyjylar milli diplomatiýamyzy bütin dünýäde dabaralandyrýan Gahryman Arkadagymyza hem-de hormatly Prezidentimiz Arkadagly Gahryman Serdarymyza hoşallyk sözlerini beýan etdiler.
Oguldürli GELDIÝEWA,
Türkmenistanyň Daşary işler ministrliginiň
Halkara gatnaşyklary institutynyň
Halkara žurnalistikasy fakultetiniň 1-nji ýyl talyby.