Energetika diplomatiýasy: türkmen-pakistan hyzmatdaşlygy barada okuw sapagy
2022-nji ýylyň 26-njy dekabrynda Türkmenistanyň Daşary işler ministrliginiň Halkara gatnaşyklary institutynda döredilen Türkmenistanyň diplomatiýasynyň möhüm ugurlary boýunça okuw Merkezinde “Energetika diplomatiýasy” barada Türkmenistanyň Pakistan Yslam Respublikasyndaky Adatdan daşary we Doly ygtyýarly Ilçisi Atajan Möwlamow, şeýle-de institutyň talyplarynyň gatnaşmagynda okuw sapagy geçirildi. Okuw sapagynda Türkmenistan bilen Pakistan Yslam Respublikasynyň arasyndaky energetika hyzmatdaşlygynyň ileri tutulýan ugurlary boýunça gürrüň edildi.
Ilçi Atajan Möwlamow okuw sapagynyň dowamynda ýangyç-energetika pudagynyň Türkmenistan bilen Pakistanyň arasyndaky gatnaşyklarynyň möhüm ugurlarynyň biridigini belläp, bu ugurda ikitaraplaýyn hem-de köptaraplaýyn görnüşde hyzmatdaşlygyň yzygiderli ýokarlanýandygyny nygtady. Hususan-da, iki ýurduň arasynda birnäçe iri energetika taslamalarynyň we Türkmenistan-Owganystan-Pakistan-Hindistan gaz geçirijisiniň durmuşa geçirilýändigine üns çekildi. TOPH gaz geçirijisi sebitara hyzmatdaşlyga täze itergi berer. Tejribeli diplomat iki ýurduň arasyndaky özara hormat goýmak ýörelgelerine esaslanýan dostlukly gatnaşyklar barada gürrüň açyp, Türkmenistan bilen Pakistanyň arasyndaky syýasy-diplomatik gatnaşyklaryň önjeýli ösüşine hem ýokary baha berdi.
Täsirli geçen okuw sapagynyň dowamynda talyplar türkmen-pakistan gatnaşyklary, ýurdumyzyň alyp barýan energetika diplomatiýasy bilen bagly sowallary bilen Ilçä ýüzlenip, olara giňişleýin jogap aldylar.
Eziz EMINOW,
Türkmenistanyň Daşary işler ministrliginiň
Halkara gatnaşyklary institutynyň
Halkara žurnalistikasy fakultetiniň II ýyl talyby.