Ekologiýa we suw diplomatiýasyna bagyşlanan okuw sapagy
2022-nji ýylyň 23-nji dekabrynda Türkmenistanyň Daşary işler ministrliginiň Halkara gatnaşyklary institutynda döredilen Türkmenistanyň diplomatiýasynyň möhüm ugurlary boýunça okuw Merkezinde “Ekologiýa we suw diplomatiýasy” ugry boýunça Türkmenistanyň Gyrgyz Respublikasyndaky Adatdan daşary we Doly ygtyýarly Ilçisi Şadurdy Meredowyň, şeýle-de institutyň talyplarynyň gatnaşmagynda okuw sapagy geçirildi. Okuw sapagy Türkmenistan bilen Gyrgyz Respublikasynyň arasyndaky suw we ekologiýa diplomatiýasynyň aýratynlyklary, şeýle hem türkmen-gyrgyz hyzmatdaşlygy dogrusynda alnyp barylýan işlere bagyşlandy.
Hormatly Ilçi tebigata aýawly garamak, daşky gurşawy goramak, geljekki nesiller üçin onuň baýlyklaryny gorap saklamak, halkymyzyň oňaýly durmuş-ýaşaýyş şertlerini üpjün etmek üçin ýer-suw serişdelerinden oýlanyşykly peýdalanmak, Durnukly ösüş maksatlaryna ýetmekde dünýä jemgyýetçiliginiň tagallalaryny birleşdirmek ýaly meseleler dogrusynda gyzykly maglumatlary aýtdy. Şeýle hem türkmen-gyrgyz gatnaşyklarynyň iki doganlyk halkyň hoşniýetli goňşuçylyk, köpasyrlyk dostluk, ruhy we medeni-taryhy umumylyk esaslaryna daýanýandygyny kanagatlanma bilen belläp geçdi.
Okuw sapagynyň dowamynda suw-ekologiýa meseleleri çözülende halkara hukugyň umumy kabul edilen kadalaryna daýanmak, sebitiň ähli ýurtlarynyň bähbitlerini nazara almak hem-de abraýly halkara guramalaryny, ilkinji nobatda, Birleşen Milletler Guramasyna işjeň gatnaşmaga çekmekligiň zerurlygy aýratyn bellenilip geçildi. Geçirilen bu okuw sapagy talyplar üçin örän täsirli bolup, olar özlerini gyzyklandyrýan sowallara giňişleýin jogap aldylar, şeýle-de bilimlerini has kämilleşdirdiler.
Maksat REJEPOW,
Türkmenistanyň Daşary işler ministrliginiň
Halkara gatnaşyklary institutynyň
Halkara žurnalistikasy 3-nji ýyl talyby.