Durnukly ösüş maksatlarynyň ählumumy energiýa üpjünçiligi boýunça okuw sapagy
2024-nji ýylyň 20-njy martynda Türkmenistanyň Daşary işler ministrliginiň Halkara gatnaşyklary institutynda döredilen Türkmenistanyň diplomatiýasynyň möhüm ugurlary boýunça okuw merkezinde “Energetika diplomatiýasy” we onuň durnukly ösüşini üpjün etmek boýunça hyzmatdaşlykdaky orny, durnukly ösüş maksatlarynyň ählumumy energiýa üpjünçiligi boýunça öňde goýlan wezipelerini kesgitlemekde we işläp düzmekde Türkmenistanyň goşandy barada institutymyzyň Halkara gatnaşyklary we diplomatiýa kafedrasynyň mugallymy, Türkmenistanyň Adatdan daşary we Doly ygtyýarly ilçisi, Türkmenistanyň ussat diplomaty Kakajan Mommadowyň, şeýle-de institutyň talyplarynyň gatnaşmagynda okuw sapagy geçirildi.
Okuw sapagynyň dowamynda mugallym ählumumy dünýäniň häzirki zaman ösüşinde energetika howpsuzlygy we durnukly energetika meseleleri öňdebaryjy orunlary eýeleýändigi, dünýäniň ýüzbe-ýüz bolýan islendik meselelerinde we mümkinçiliklerinde energiýa babatynda gatnaşyklaryň wajypdygy, iş ýerleriniň döredilmegi, howpsuzlyk, howanyň global üýtgemegi, azyk önümçiligi we beýleki birnäçe meselelerde – energiýa bolan zerurlygyň kesgitleýji şert bolup durýandygy barada çykyş etdi.
Bilişimiz ýaly, 2015-nji ýylyň 25-nji sentýabrynda BMG-niň agza döwletleriniň duşuşygynda 2030-njy ýyla çenli döwür üçin niýetlenen Durnukly ösüş babatda täze Gün tertibi hem-de onuň esasy düzümleri hökmünde Durnukly ösüşiň 17 maksady kabul edildi. Olar has möhüm ykdysady, durmuş, ekologiýa we dolandyryş meselelerine degişlidir. Ykdysady ugur tebigy, energetika, maddy-önümçilik serişdelerini rejeli peýdalanmakda jemlense, durmuş ugry adamzadyň ösmegine, durmuş we medeni ulgamlaryň durnuklylygyny üpjün etmäge gönükdirilendir, ekologiýa ugry bolsa, tebigy ulgamlaryň biologiýa we fiziki bitewüligini üpjün etmekde jemlenýär. Energetika meselelerine ählumumy hyzmatdaşlygyň möhüm ugry hökmünde Durnukly ösüş maksatlarynyň 7-nji maksadynyň «Hemmeler üçin ygtybarly, durnukly we döwrebap energiýa çeşmelere elýeterliligiň üpjün edilmegi» diýlip yglan edilmegi bu meseläniň global häsiýete eýedigi bilen baglanyşyklydyr.
Suraý ÖWLIÝAGULYÝEWA,
Türkmenistanyň Daşary işler ministrliginiň
Halkara gatnaşyklary institutynyň mugallymy.