Döredijilik duşuşygy geçirildi
2024-nji ýylyň 3-nji maýynda Türkmenistanyň Daşary işler ministrliginiň Halkara gatnaşyklary institutynda bu ýokary okuw mekdebiň uly mugallymy, ýurdumyzyň belli edebiýatşynasy, filologiýa ylymlarynyň kandidaty, şahyr Baba Saryýew bilen döredijilik duşuşygy geçirildi. Bu duşuşyk «Magtymguly we häzirki zaman edebiýaty» atly mowzuga bagyşlanyldy. Oňa institutyň mugallymlary we talyp ýaşlary gatnaşdylar.
Duşuşygyň dowamynda Baba Saryýew Magtymguly Pyragynyň döredijiligi barada gyzykly maglumatlary gürrüň berdi. Bilşimiz ýaly, 2024-nji ýylda diňe bir ýurdumyzda däl, eýsem, dünýäniň ýüzünde Magtymgulynyň 300 ýyllygy giňden dabaralanýar. Gahryman Arkadagymyzyň, Arkadagly Gahryman Serdarymyzyň uly tagallalary bilen bu günki gün akyldar şahyrymyzyň edebi mirasy giňden öwrenilýär. Halkymyzyň beýik şahyrynyň goşgulary dünýäniň ençeme dillerine terjime edildi.
Geçirilen döredijilik duşuşygynyň dowamynda Türkmenistanyň Daşary işler ministrliginiň Halkara gatnaşyklary institutynda okaýan, döredijilik bilen meşgullanýan talyp ýaşlar hem çykyş etdiler. Olar çykyşlarynyň dowamynda ýurdumyzy, bagtyýar zamanamyzy wasp edýän buýsançly goşgularyny hem okadylar. Duşuşygyň ahyrynda talyplar halypa edebiýatşynasa özüniň gyzyklanýan sowallaryny berip, gerekli maglumatlaryny öwrendiler.
Bereket ÖWEZGELDIÝEW,
Türkmenistanyň Daşary işler ministrliginiň
Halkara gatnaşyklary institutynyň
Halkara žurnalistikasy fakultetiniň III ýyl talyby.