Diplomat bolmagy ýüregine düwen ýaş türgen
TDIM-iň Halkara gatnaşyklary institutynyň halkara ykdysady gatnaşyklary fakultetiniň 3-nji ýyl talyby Dürdäne Nazargylyjowa.
Sport — parahatçylygyň ilçisi. Şu ýörelgeden ugur alnyp, Türkmenistanda sport diplomatiýasyna aýratyn üns berilýär. Has anyk aýtsak, Arkadagly Gahryman Serdarymyz tarapyndan türkmen türgenlerine içerki we halkara ýaryşlara taýýarlanmak üçin ähli şertler döredilýär, dünýäni birleşdiriji güýç bolan sporta ýaş nesli has-da gyzyklandyrmak babatda uly tagallalar edilýär. Guwandyryjy tarapy ýurdumyzyň sport diplomatiýasynyň üstünlikli durmuşa geçirilmegine türkmen diplomatiýasynyň milli mekdebi bolan Türkmenistanyň Daşary işler ministrliginiň Halkara gatnaşyklary institutynyň talyplary hem özleriniň ýeňişleri bilen mynasyp goşant goşýarlar. Gazetiň şu sanynda şeýle ýaşlaryň biri, karateniň dürli görnüşleri boýunça Türkmenistanyň birnäçe gezek çempiony, karate boýunça 1-nji derejeli sport ussady, TDIM-iň Halkara gatnaşyklary institutynyň halkara ykdysady gatnaşyklary fakultetiniň 3-nji ýyl talyby Dürdäne Nazargylyjowa bilen taýýarlanylan söhbetdeşligi okyjylarymyza ýetirmegi müwessa bildik.
— Dürdäne, ilki bilen, sizi golaýda karateniň kýokuşinkaý görnüşi boýunça nobatdaky gezek Türkmenistanyň çempiony bolmagyňyz mynasybetli tüýs ýürekden gutlaýarys! Söhbetdeşligimizi çempionlyk duýgulary bilen başlaýaly?!
— Sag boluň! Islendik ýaryşda hem hormat münberinden orun almak ýakymly duýgy. Ýurt we halkara derejesindäki ýaryşlarda gazanylan çempionlyk bolsa has-da göwnüňi göterýär. Umuman-a, ýaryşlarda gazanylýan ýeňişleri, mynasyp bolunýan medallary maşgalamyň, tälimçilerimiň, ýokary okuw mekdebimdäki mugallymlarymyň, iň esasy hem, türkmen halkynyň Milli Lideri Gahryman Arkadagymyzyň, Arkadagly Gahryman Serdarymyzyň maňa bildiren ynamlaryny ödemekde ujypsyzja goşandym hasaplaýaryn. Ýeňiş — yhlasyň myrat tapmagy. Ýeňiş — senden edilen tamalaryň ödelmegi. Şonuň üçin hem medallar we çempionlyklar hemişe meni çäksiz begendirýär.
— Şu ýerde näme üçin sportuň karate görnüşini saýlandygyňyz, bu ugurdaky ilkinji ädimleriňiz barada hem aýdaýsaňyz!
— Men 2014-nji ýylda 10 ýaşymdakam Daşoguz welaýatynyň Görogly etrabyndaky Sport mekdebine gatnap başladym. Ilkibaşda bir aý töweregi woleýbol bilen meşgullanyp, soňra karate boýunça türgenleşiklere goşuldym. Şol wagt näme üçin karateni saýlanymy bilemok, ýöne çaga göwnüm bilen eden şol saýlawyma öz ýanymdan hemişe minnetdar bolýaryn. Karate boýunça ilkinji tälimçim — Ýaňyl Kowusowa. Soňra welaýat merkezindäki sport mekdepleriniň birinde Hudaýberdi Goçnyýazowyň golastynda karate sportunyň inçe tilsimlerini öwrendim we ýaryşlara gatnaşyp başladym. Häzirki wagtda milli ýygyndynyň düzüminde Seýran Potarowyň we Farhat Jumaýewiň golastynda türgenleşýärin.
— Okyjylara şu wagta çenli gatnaşan ýaryşlaryňyz, gazanan üstünlikleriňiz barada hem gürrüň beräýseňiz!
— Karate boýunça ýaryşlara 2015-nji ýyldan bäri gatnaşýaryn. Şu wagta çenli öz ýaş derejämde kýokişunkaý karate boýunça 3 gezek (2016, 2018, 2019) Türkmenistanyň çempiony, 2 gezek (2015, 2017) çempionatyň kümüş medalynyň eýesi boldum. Mundan başga-da, ýetginjekleriň we ýaşlaryň arasyndaky Türkmenistanyň çempionatynda karateniň kata görnüşi boýunça 2 gezek (2018, 2019), toparlaýyn kata boýunça hem 2 gezek (2018, 2019) 1-nji orna mynasyp boldum.
Ulularyň arasyndaky Türkmenistanyň çempionatynda kýokişunkaý karate boýunça 2 gezek (2022, 2023) bürünç medal hem-de 1 gezek (2023) altyn medal gazandym. Şeýle-de ulularyň arasyndaky Türkmenistanyň çempionatynda 2022-ji ýylda karateniň kata görnüşi boýunça 3-nji orna, toparlaýyn kata boýunça bolsa 1-nji orna mynasyp boldum.
Halkara ýaryşlar barada aýdanymyzda 2023-nji ýylda Türkiýäniň Stambul şäherinde geçirilen aşihara karate boýunça Ýewraziýanyň II açyk çempionatynda 60 kilograma çenli agram derejede 18 — 21 ýaşly türgenleriň arasynda 2-nji orny, 21 — 24 ýaşly türgenleriň arasynda bolsa 65 kilograma çenli agram derejede 1-nji orny eýeledim.
— Tüweleme, şeýle üstünlikleriňiziň höwri kän bolsun! Dürdäne, bilşime görä, siz sportuň beýleki ugurdaş görnüşleri bilen hem meşgullanýarsyňyz. Şular dogrusynda hem gysgaça durup geçäýsek!
— Karateden başga taýboks we kikboks boýunça hem ýaryşlara gatnaşýaryn.
Taýboks boýunça 2018-nji ýylda ýaşlaryň arasyndaky Türkmenistanyň çempionatynda 48 kilograma çenli agram derejede 3-nji orna, 2019-2020-nji ýyllarda bolsa ýaşlaryň arasynda 54 kilograma çenli agram derejede 2 gezek «Türkmenistanyň çempiony» diýen ada eýe boldum. Ulularyň arasyndaky Türkmenistanyň çempionatynda 2018-nji ýylda 1-nji orna, 2019-njy ýylda 2-nji orna mynasyp boldum.
Kikboks boýunça 2018-nji ýylda ýaşlaryň arasyndaky Türkmenistanyň çempionatynda 48 kilograma çenli agram derejede 1-nji ýeri eýeledim.
— Elbetde, gazanan üstünlikleriňiziň ählisi hem özüne ýetesi ähmiýete eýedir. Şolaryň arasynda iň ýatda galyjysy haýsysy bolupdy?!
— Türkiýäniň Stambul şäherinde geçirilen aşihara karate boýunça Ýewraziýanyň II açyk çempionatynda 21 — 24 ýaşly türgenleriň arasynda 65 kilograma çenli agram derejede çempion bolmagym häzire çenli gazanan ýeňişlerimiň arasynda iň ýatda galyjysy boldy. Çünki şol ýaryşda meniň çempionlygym mynasybetli Türkmenistanyň Döwlet baýdagy belende göterildi hem-de ýurdumyzyň Döwlet senasy ýaňlandy. Bu meni örän buýsandyrdy. Sebäbi halkara arenada gazanylýan şeýle üstünlik diňe meniň däl, eýsem, her bir türgeniň iň uly arzuwydyr.
— Geljekde nähili maksatlary öňüňizde goýýarsyňyz?
— Geljekde öňde goýýan maksatlarym we arzuwlarym iki ugra bölünýär. Olaryň birinjisi türgen hökmünde yklym we dünýä çempionatlarynda çempion bolmak arkaly ýurdumyzyň sport abraýyny has-da belende galdyrmak, Olimpiýa oýunlarynda medal gazanmak. Ikinjisi bolsa kämil diplomat bolup ýetişip, ählumumy abadançylyga, halklaryň bagtyýar durmuşda ýaşamaklaryna gönükdirilen Türkmenistanyň parahatsöýüjilikli Bitaraplyk syýasatyny dünýä ýaýmak. Bularyň ikisine hem ýetjekdigime pugta ynamym bar. Çünki biziň ýurdumyzda türkmen ýaşlarynyň öz arzuwlaryna ýetmekleri üçin türkmen halkynyň Milli Lideri
Gahryman Arkadagymyz, Arkadagly
Gahryman Serdarymyz tarapyndan ähli şertler döredilýär.
— Dürdäne, beren gyzykly gürrüňleriňiz üçin köp sag boluň! Geljekde türgen hökmünde dünýä arenalarynyň münberlerinde iň ýokarky orunlary almagyňyzy, halkaraçy hünärmen — diplomat hökmünde Türkmenistanyň dünýä ähmiýetli başlangyçlarynyň bir bölegi bolmagyňyzy arzuw edýäris!
— Köp sag boluň!
Sahypany taýýarlan: Mätgurban MÄTGURBANOW,
Türkmenistanyň Daşary işler ministrliginiň
Halkara gatnaşyklary institutynyň
halkara žurnalistikasy hünäriniň talyby, «Biznes reklama».