DIL HEPDELIGI MYNASYBETLI SERGI GEÇIRILDI
2024-nji ýylyň 18-nji aprelinde Türkmenistanyň Daşary işler ministrliginiň Halkara gatnaşyklary institutynda bu ýokary okuw mekdebinde okadylýan II daşary ýurt dillerine bagyşlanyp sergi açyldy. Bu sergi arap, nemes we ýapon dillerini okadýan mugallymlar we şol dilleri öwrenýän (III we IV ýyl) talyplar tarapyndan guraldy. Sergide arap, nemes we ýapon medeniýetiniň özboluşly nusgalary beýan edildi. Bu sergi institutda dowam edýän daşary ýurt dilleri boýunça hepdeligiň çäklerinde alnyp baryldy. Çäräniň dowamynda arap, nemes we ýapon dillerinde institutyň talyplary bilen gürrüňdeşlikler, bäsleşikler we gyzykly oýunlar geçirildi.
Çäre institutyň talyplarynyň arasynda daşary ýurt dillerini öwrenmäge bolan gyzyklanmalary artdyrmak we daşary ýurt medeniýetleri bilen ýakyndan tanyş bolmak maksady bilen guraldy. Sergidäki arap, nemes we ýapon dillerinde neşir edilen kitaplar, talyplar tarapyndan taýýarlanan suratlar, degişli ýurtlaryň milli naharlary sergä özboluşly görk berdi.
Aziza HUDAÝNAZAROWA,
Türkmenistanyň Daşary işler ministrliginiň
Halkara gatnaşyklary institutynyň
Halkara žurnalistikasy fakultetiniň III ýyl talyby.