Daşary söwda dolanyşygynyň mümkinçiliklerine bagyşlanan ylmy-amaly maslahat
2021-nji ýylyň 8-nji oktýabrynda Türkmenistanyň Daşary işler ministrliginiň Halkara gatnaşyklary institutynda wideo aragatnaşyk arkaly “Milli ykdysadyýetiň ösüşinde daşary söwda gatnaşyklarynyň ähmiýeti” atly ylmy-amaly maslahat geçirildi. Türkmenistanyň Döwlet energetika instituty we Türkmenistanyň Daşary işler ministrliginiň Halkara gatnaşyklary instituty tarapyndan bilelikde guralan bu maslahata “Ýaş ykdysatçylar” ylmy gurnagynyň agzalary, ýokary okuw mekdepleriniň mugallymlary we talyplary gatnaşdylar.
Maslahatda Türkmenistanyň Döwlet energetika institutynyň we Türkmenistanyň Prezidentiniň ýanyndaky Döwlet gullugy akademiýasynyň, şeýle-de Türkmenistanyň Daşary işler ministrliginiň Halkara gatnaşyklary institutynyň Halkara ykdysady gatnaşyklary fakultetiniň professor-mugallymlary çykyş etdiler. Olar öz çykyşlarynda Berkarar döwletimiziň bagtyýarlyk döwründe ýurdumyzda hormatly Prezidentimiziň daşary ykdysady gatnaşyklary ösdürmeklik babatda alyp barýan syýasatynyň durmuşa üstünlikli geçirilişi we bu ugurda ýetilýän belent sepgitleri dogrusynda belläp geçdiler. Mundan başga-da, maslahatda “Türkmenistanyň 2021–2030-njy ýyllar üçin daşary söwda Strategiýasy” hem-de oňa laýyklykda düzülen “Ýol kartasynda” bellenen wezipeleriň üstünlikli amala aşyrylmagy barada alnyp barylýan işler aýratyn nygtaldy.
Şeýle-de ylmy-amaly maslahatlaryň, duşuşyklaryň we birnäçe çäreleriň yzygiderli geçirilmegi tejribe alyşmakda we göni işewürlik gatnaşyklaryny ýola goýmakda uly ähmiýete eýedir.
Maslahatyň ahyrynda oňa gatnaşyjylar ýaşlar üçin döredip berilýän giň mümkinçilikleri we goldawlary üçin hormatly Prezidentimize alkyş sözlerini aýtdylar.
Ýupar EGIRJÄÝEWA,
Türkmenistanyň Daşary işler ministrliginiň
Halkara gatnaşyklary institutynyň
Halkara ykdysady gatnaşyklary
fakultetiniň I ýyl talyby