ÇEKELEŞIKLI GEÇEN BÄSLEŞIK
2022-nji ýylyň 11-nji martynda Türkmenistanyň Daşary işler ministrliginiň Halkara gatnaşyklary institutynyň «Ýaş diplomatlar» ylmy gurnagynyň agzalarynyň gatnaşmagynda «Parahatçylygyň ýaş çaparlary» atly akyl-paýhas bäsleşigi geçirildi. Bu bäsleşikde talyplar «Horezmşalar we onuň diplomatiýasy» atly temadan özara bäsleşdiler. Bäsleşige gatnaşan talyplar institutyň binasynda ýörite guralan Ak öýde ýerleşdirilen heýkeller, hususan-da Türkmenistanyň Halk suratkeşi, Magtymguly adyndaky Halkara baýragynyň eýesi halypa heýkeltaraş Saragt Babaýewiň "Jelaleddin" atly heýkeli, TDÇA-nyň mugallymy Gülara Babaýewanyň "Tumarşa" atly işi, şeýle hem şol döwri ýatladýan suratlar, küýze önümleri bilen içgin tanşyp, Horezmşalar döwrüne degişli täze maglumatlary öwrendiler.
Bäsleşik çekeleşikli geçip, onuň netijeleri boýunça Halkara gatnaşyklary fakultetiniň I ýyl talyplary Kerim Baýmyradow we Batyr Esenow baýrakly orunlara mynasyp boldular.
Institutda täze açylan Ýaş diplomatlaryň mekdebi tarapyndan gurnalýan «Parahatçylygyň ýaş çaparlary» atly akyl-paýhas bäsleşiginiň diňe bir okuwçylaryň arasynda däl, eýsem, talyplaryň arasynda hem geçirilmegi olaryň ukyp-başarnyklaryny artdyrmaga, watançylyk duýgusyny has-da berkitmäge itergi berýär.
Arslan SYÝAHATOW,
Türkmenistanyň Daşary işler ministrliginiň
Halkara gatnaşyklary institutynyň
Halkara gatnaşyklary fakultetiniň I ýyl talyby.