Çagalary goramagyň halkara güni mynasybetli dabara
2025-nji ýylyň 31-nji maýynda Türkmenistanyň Daşary işler
ministrliginiň Halkara gatnaşyklary institutynda 1-nji iýun ― Çagalary
goramagyň halkara güni mynasybetli baýramçylyk çäresi geçirildi. Oňa
ýurdumyzdaky daşary ýurtlaryň diplomatik wekilhanalarynyň işgärleriniň
çagalary, Döwletliler köşgüniň okuwçylary, şeýle hem institutyň
professor-mugallymlarydyr talyp ýaşlary işjeň gatnaşdylar.
Dabaranyň başynda Türkmenistanyň Daşary işler ministrliginiň
Halkara gatnaşyklary institutynyň rektory Gülşat Ýusupowa gutlag sözi
bilen çykyş etdi. Şunda ýurdumyzda erkana ýaýnaýan bagtyýar
çagalarymyzyň rahat dynç alyp, okap, öwrenip, döredip, ylymly-bilimli,
giň dünýägaraýyşly, sagdyn bedenli, edep-terbiýeli, Watana wepaly bolup
ýetişmeklerine gönükdirilen maksatnamalaryň üstünlikli amala
aşyrylýandygy bellenildi. Baýramçylyk dabarasynyň dowamynda
çagalaryň wagtyny şadyýan hem-de peýdaly geçirmekleri üçin dürli
çäreler guraldy. Has takygy, dabarada erteki gahrymanlarynyň keşbinde
çykyş eden talyplaryň çagalara sowgatlary paýlamagy olarda ýakymly
täsirleri galdyrdy. Soňra talyplaryň daşary ýurt dillerinde çagalar hakynda
aýdymlary ýaňlandy. Çagalar daşary ýurt dillerinde goşgulary ýerine
ýetirdiler.
Dabaranyň dowamynda çagalar «döredijilik meýdançasynda» reňkli
kagyzlardan, ýapraklardan tebigy şekilleri, el işlerini ýasadylar.
Körpejeleriň sport oýunlary meýdançasynda dürli maşklary ýerine
ýetirmekleri sagdyn durmuş endiklerini ösdürmekde ähmiýetli boldy.
Soňra çagalar zehin bäsleşiklerinde özleriniň ukyp-başarnyklaryny
görkezdiler. «Ertekiler meýdançasynda» talyplaryň halk ertekilerinden
parçalary ýerine ýetirmekleri çagalary jadyly dünýä syýahata alyp gitdi.
Şeýle-de «Türkmen medeniýeti» burçunda çagalar milli medeniýetimiziň
aýratynlyklary bilen tanyşdyryldy.
Baýramçylyk çäresiniň ýapylyş dabarasynda çagalar we myhmanlar
özleriniň ýagşy arzuw-isleglerini, minnetdarlyklaryny reňkli boýaglardyr
kagyzlar bilen beýan etmekleri dabara aýratyn öwüşgin çaýdy. Şeýle
çäreleriň guralmagy körpe çagalaryň wagtyny şadyýan, peýdaly
geçirmeklerine, olarda ynsanperwerlik, birek-birege ýardam bermek ýaly
häsiýetleriň kämilleşmegine uly goşant goşýar.
Annagül HEKIMOWA,
Türkmenistanyň Daşary işler ministrliginiň
Halkara gatnaşyklary institutynyň
Dünýä dilleri kafedrasynyň mugallymy.