Bütindünýä saglyk güni mynasybetli dabaraly çäre geçirildi
Ajaýyp zamanamyzda sport we bedenterbiýe, sagdyn durmuş ýörelgeleri ugrunda uly işler alnyp barylýar. Her ýylyň 7-nji aprelinde Bütindünýä saglyk güni mynasybetli ýurdumyzda köpçülikleýin bedenterbiýe-sport we sagdyn durmuş çäreleri guralýar. Türkmenistanyň Daşary işler ministrliginiň Halkara gatnaşyklary institutynda hem 2026-njy ýylyň 2-nji aprelinde Bütindünýä saglyk güni mynasybetli dürli sport we sagdyn durmuş ýörelgelerini wagyz edýän çäre geçirildi. Oňa institutyň mugallymlarydyr talyp ýaşlary gatnaşdylar.
Guralan çäräniň çäklerinde ýaşlaryň arasynda köpçülikleýin bedenterbiýe maşklary, sport bäsleşikleri hem-de görkezme çykyşlary geçirildi. Şeýle-de, talyplaryň arasynda tigirli ýörişler guraldy. Çärä gatnaşanlar sagdyn durmuş ýörelgelerini berjaý etmegiň, sport bilen meşgullanmagyň we işjeň ýaşaýşyň ähmiýeti barada giňişleýin maglumat aldylar. Aýdym-sazly dabara bolsa geçirilýän çäräniň has-da täsirini artdyrdy.
Bütindünýä saglyk güni mynasybetli dürli sport we sagdyn durmuş ýörelgelerini wagyz edýän çäräniň esasy maksady ýaşlaryň saglygyny berkitmek, olaryň sporta bolan gyzyklanmasyny artdyrmak hem-de jemgyýetde sagdyn durmuş ýörelgelerini giňden wagyz etmekden ybarat boldy.
Nurana NURBERDIÝEWA,
Türkmenistanyň Daşary işler ministrliginiň
Halkara gatnaşyklary institutynyň
Halkara žurnalistikasy fakultetiniň 1-nji ýyl talyby.