Bütindünýä audiogörnüş miras güni
Audiogörnüş arhiwler bize dünýäniň dürli künjeklerindäki adamlaryň durmuşy we medeniýeti barada gürrüň berýär. Olar jemgyýetçilik hakydasynyň we bilimleriň gymmatly çeşmesi bolan bahasyna ýetip bolmajak mirasdyr. Bu mirasy gorap saklamak we onuň geljekki nesillerimiz üçin elýeterli bolmagyny gazanmak ähli edaralar, umumy jemgyýet üçin baş maksatdyr. Şu maksat bilen ÝUNESKO-nyň arhiwi «Umumy ÝUNESKO taryhymyzy sanlylaşdyrmak» taslamasyna badalga berdi.
Bütindünýä audiogörnüş miras güni (WDAH) Hereket edýän suratlary goramak we olary aýap saklamak baradaky Teklibiň 1980-nji ýylda geçirilen XXI Baş maslahatynda kabul edilmegi bilen baglydyr. Bütindünýä güni gysga wagtda degişli çäreleri görmegiň zerurlygy we audiogörnüş resminamalaryň ähmiýetini ykrar etmek üçin pursat döredýär.
Şeýlelik bilen, Bütindünýä audiogörnüş miras güni ÝUNESKO-nyň agza döwletleri üçin 2015-nji ýyldaky Resminama mirasyny gorap saklamak we muňa elýeterliligi üpjün etmek baradaky Teklibi durmuşa geçirmek babatynda amala aşyrýan işlerine baha bermäge mümkinçilik döredýär.
Bu ýyl Bütindünýä audiogörnüş miras güni 27-nji oktýabrda «Dünýä siziň penjiräňizde» şygar bilen belleniler. Dünýä çykmaga penjire bolan audiogörnüş miras bize gatnaşmaýan wakalarymyzyň şaýady bolmaga, geçmişiň ýaňyny eşitmäge, habar beriji we gyzyklandyryjy eserleri döretmäge mümkinçilik berýär. Kino we wideolarda düşürilen ýazgy sesleri, surat şekilleri öwrenmek arkaly diňe bir medeni baýlygyň gymmatyny bilmek bilen çäklenmän, eýsem, ondan ähmiýetli sapaklary hem alýarys.
Berdigylyç ÝAZMYRADOW,
Türkmenistanyň Daşary işler ministrliginiň
Halkara gatnaşyklary institutynyň
Halkara žurnalistikasy fakultetiniň II ýyl talyby