Bütindünýä akkreditasiýa güni
Her ýylyň 9-njy iýunynda Bütindünýä akkreditasiýa güni giňden bellenilýär. Bu bütindünýä güni halkara akkreditasiýa guramalarynyň - Halkara Laboratoriýalaryň Akkreditasiýasynyň Hyzmatdaşlygynyň (ILAC) we Halkara Akkreditasiýa Forumynyň (IAF) başlangyjy boýunça ykdysady we jemgyýetçilik durmuşynyň ähli ugurlarynda akkreditasiýanyň ähmiýetini köpçülige ýetirmek, wagyz etmek maksady bilen döredildi.
Her ýyl IAF we ILAC belli bir ulgamda akkreditasiýanyň zerurlygyny açyp görkezýän baýramçylygyň temasyny kesgitleýärler. Bu ýyl bolsa ol "Akkreditasiýa: Durnukly ösüş maksatlaryny durmuşa geçirmäge kömek" diýlip atlandyryldy.
Standartlaşdyrmak, metrologiýa, laýyklygy bahalandyrmak we bazara gözegçilik ýaly hil infrastrukturasynyň beýleki elementleri bilen bir hatarda, akkreditasiýa Durnukly ösüş maksatlarynyň durmuşa geçirilmegine möhüm goşant goşýar.
Şu ýerde žurnalistiň akkreditasiýasy dogrusynda durup geçmek zerurdyr. Žurnalistiň akkreditasiýasy žurnalistiň bir çärä gatnaşmagy we işlemegi üçin resmi rugsatdyr. Akkreditasiýa etmegiň zerurlygy ýok çäreler hem bar, bulara esasan, konsertler, seminarlar, şäher baýramçylyklary we ş.m. degişlidir. Çäre näçe wajyp we resmi bolsa, şol ýerde akkreditasiýa hökman talap edilýär. Meselem, döwlet ähmiýetli çäreler, döwlet baştutanynyň gelmegi, tegelek stollar we ş.m. şeýle çärelere mysal bolup biler.
Mähriban HUDAÝGULYÝEWA,
Türkmenistanyň Daşary işler ministrliginiň
Halkara gatnaşyklary institutynyň
Halkara žurnalistikasy fakultetiniň I ýyl talyby.