Bu gün — Çagalary goramagyň halkara güni
- Çagalary goramagyň halkara güni baýramçylyk hökmünde ilkinji gezek 1925-nji ýylda çagalaryň abadançylygyna bagyşlanan Bütindünýä konferensiýasynda kabul edilýär. Çagalar bilen bagly meselelere köpçüligiň ünsüni çekmek maksady bilen, baýramçylyk senenamasyna girizilen bu halkara gün ilkinji gezek 1950-nji ýylda dünýäniň 51 ýurdunda giňden bellenilip geçildi. Ýeri gelende aýtsak, çagalaryň ähli hukuklary we azatlyklary 1959-njy ýylda Birleşen Milletler Guramasynyň Baş Assambleýasy tarapyndan kabul edilen Çaga hukuklary Jarnamasynda öz beýanyny tapýar. Jarnamada jemgyýetiniň gelip çykyşyna, milletine, emläk ýagdaýyna, derisiniň reňkine garamazdan, ähli babatda çagalaryň deň hukuklary beýan edilýär.
Mälim bolşy ýaly, Türkmenistanyň Jemgyýetçilik guramalary tarapyndan Çagalary goramagyň halkara güni mynasybetli, ýurdumyzyň dürli künjeklerindäki medeni-dynç alyş seýilgählerinde gyzykly çäreleriň ençemesi guralýar.
Türkmenistan — bagtly çagalaryň ülkesi. Çünki biziň ýurdumyzda türkmen halkynyň Milli Lideri Gahryman Arkadagymyzyň hem-de hormatly Prezidentimiziň baştutanlygynda çagalar üçin uly mümkinçilikler döredilýär. Ýaş nesliň ylymly-bilimli, sagdyn bedenli ýaşlar bolup ýetişmekleri ugrunda birnäçe işler alnyp barylýar. Goý, eziz ýurdumyzda çagalaryň gülki sesleri belentden-belent ýaňlansyn!
Begnazar BEGNAZAROW,
Türkmenistanyň Daşary işler ministrliginiň
Halkara gatnaşyklary institutynyň
halkara žurnalistikasy fakultetiniň I ýyl talyby.