Bişkekde sebit bilermenleriniň duşuşygy geçirildi
2023-nji ýylyň 27-nji aprelinde Gyrgyzystanyň paýtagty Bişkek şäherinde Merkezi Aziýa ýurtlarynyň Strategik barlaglar we seljeriş merkezleriniň wekilleriniň duşuşugy geçirildi.
Beýik Britaniýa Patyşalygynyň Birleşen Gulluklar Instituty (Royal United Servises Institute - RUSI) tarapyndan gibrid formatda gurnalan bu duşuşyga RUSI-niň bilermeni Rafaello Pantuççi hem-de Merkezi Aziýa ýurlarynyň, ýagny Gyrgyzystanyň, Gazagystanyň, Özbegistanyň, Täjigistanyň we Türkmenistanyň ylmy-seljeriş we strategik barlaglar merkezleriniň wekilleri gatnaşdylar. Türkmen taparyna Türkmenistanyň Daşary işler ministrliginiň Halkara gatnaşyklary institutynyň Strategik barlaglar boýunça ylmy merkeziniň ylmy işgäri Döwletmyrat Mämmedow wekilçilik etdi.
Bilermenler esasan Russiýa-Ukraina gapma-garşylygy sebäpli dünýäde emele gelen syýasy we ykdysady çökgünlik ýagdaýynda Hytaý Halk Respublikasynyň Merkezi Aziýa ýurtlaryna bildirýän gyzyklanmalary barada maslahat etdiler. Has takygy, syýasy-ykdysady we medeni-ynsanperwer gatnaşyklar, howpsuzlyk boýunça meseleler maslahatyň üns merkezinde boldy.
Wideo-aragatnaşyk arkaly gatnaşan türkmen wekili depginli ösýän Hytaý Halk Respublikasynyň ykdysady babatda Türkmenistanyň iň uly we ygtybarly hyzmatdaşynyň bolup durýandygyny aýtmak bilen, häzirki günde sebit ýurtlarynyň we Hytaýyň arasyndaky haryt dolanyşygynyň 50,1 milliard ABŞ dollaryndan aşandygyny, 2030-njy ýyla çenli bolsa bu görkezijiniň möçberiniň 70 milliard ABŞ dollaryna ýetirilmeginiň maksat edilýändigini belledi. Şeýle-de Türkmenistanda hytaý halkynyň baý we özboluşly medeniýetine uly gyzyklanma bildirilýandigi, hytaý diliniň diňe bir ýöriteleşen ýokary okuw mekdeplerinde däl-de, eýsem soňky ýyllarda orta mekdeplerde hem okadylyp başlanandygy barada mälim etdi.
Çykyşyň ahyrynda Merkezi Aziýa ýurtlarynyň halkara meselelerinde parahatçylygyň we ynamyň täze gün tertibini döretmek, şeýle hem dartgynlygy kadalaşdyrmak we dawa-jenjelleriň öňüni almak boýunça BMG-niň Düzgünnamasyna esaslanýan gepleşiklere ýol açmak üçin bilelikdäki tagallalaryň ediljekdigine ynam bildirildi.
Türkmenistanyň Daşary işler ministrliginiň
Halkara gatnaşyklary institutynyň
Strategik barlaglar boýunça ylmy merkezi