BILIM ULGAMYNDA TÜRKMEN-ÝAPON HYZMATDAŞLYGYNA BAGYŞLANAN DUŞUŞYK
2026-njy ýylyň 15-nji ýanwarynda Türkmenistanyň Daşary işler ministrliginiň Halkara gatnaşyklary institutynda Ýaponiýanyň Türkmenistandaky Adatdan daşary we Doly ygtyýarly Ilçisi Hirosi Sasaki bilen institutyň rektory G.Ýusupowanyň arasynda duşuşyk geçirildi. Duşuşyk bilim ulgamynda türkmen-ýapon hyzmatdaşlygynyň geljekki mümkinçiliklerini ara alyp maslahatlaşmak maksady bilen geçirildi.
Duşuşykda Ýaponiýanyň ýokary okuw mekdepleri bilen Türkmenistanyň Daşary işler ministrliginiň Halkara gatnaşyklary institutynyň arasynda tejribe alyşmagyň, bilelikdäki ylmy maslahatlary guramagyň we talyplaryň akademiki alyş-çalyşyny ýokarlandyrmagyň meselelerine üns çekildi. Ilçi Hirosi Sasaki öz çykyşynda ýapon tarapynyň Türkmenistanyň diplomatik işgärlerini taýýarlamakda innowasion usullary ulanmaga we medeni-ynsanperwer gatnaşyklary pugtalandyrmaga uly gyzyklanma bildirýändigini belledi.
Duşuşygyň ahyrynda taraplar iki dostlukly ýurduň arasynda ylym-bilim ulgamyndaky gatnaşyklaryň mundan beýläk-de ösdüriljekdigine ynam bildirdiler.
Şyhdurdy ŞYHYÝEW,
Türkmenistanyň Daşary işler ministrliginiň
Halkara gatnaşyklary institutynyň
Halkara gatnaşyklary fakultetiniň 3-nji ýyl talyby.