BILIM ULGAMYNDA TÄZE MÜMKINÇILIKLER
Bilim we ylym, edep-ekram düşünjeleri ynsanyň iň gowy gylyk-häsiýetlerini, belent adamkärçiligini, ahlak sypatlaryny özünde jemleýär. Olar jemgyýetçilik gatnaşyklarynyň görnüşini kesgitleýär. Hormatly Prezidentimiziň kabul edýän möhüm çözgütleri hem döwrüň talaplaryna laýyklykda, milli bilim ulgamynda geçirilýän özgertmeleriň üstünliklere beslenmegine gönükdirilendir.
Türkmenistanda ýokary hünär bilimli işgärleri taýýarlamagyň iki derejeli gurluş düzümi, şonuň ýaly-da bir derejeli gurluş düzümi bolup, taýýarlygyň ugurlary boýunça ýokary hünär biliminiň birinji derejesine bakalawr maksatnamasy, ikinji derejesine bolsa magistr maksatnamasy degişlidir.
Mähriban Watanymyzy ösüşleriň täze belentliklerine götermekde ylyma hem-de ýokary tehnologiýalara aýratyn orun berilýär. Ýurdumyzyň ýokary okuw mekdepleri häzirki zaman biliminiň hem-de öňdebaryjy ylmyň möhüm merkezleridir. Muňa ýaş alymlaryňdyr talyp ýaşlaryň ylmy işleriniň we innowasion işläp taýýarlamalarynyň bäsleşikleriniň jemleri hem şaýatlyk edýär. Ýaş alymlaryň ylmy açyşlary, senagat-innowasion tejribeleri, ylmy-inženerçilik pikirleri, maglumat-tehnologik barlaglary döwletimiziň kuwwatyny pugtalandyrmakda, aýratyn-da, ykdysadyýetimiziň sanly düzümleriniň ösdürilmeginde wajyp ähmiýete eýedir.
Şonuň bilen bir hatarda Türkmenistanyň Daşary işler ministrliginiň Halkara gatnaşyklary institutynda öz işine ussat, kämil, ýurdumyzyň ösüşine özleriniň goşandyny goşjak hünärmenleriň ýetişdirilmek maksady bilen täze açylan “Syýasy kommunikasiýa we internet žurnalistikasy”, “Gündogary öwreniş”, “Seljeriş we strategiki meýilleşdiriş” ýaly hünärler boýunça magistrantlaryň taýýarlanmaklary aýdylanlaryň aýdyň subutnamasydyr.
Her bir ugurlara degişli tassyklanan meýilnama laýyklykda institutyň tejribeli professor mugallymlary degişli temalar boýunça umumy we söhbet sapaklaryny geçýärler. Sapaklar interaktiw usulda prezentasiýalar hem-de wideoşekilli maglumatlary ulanmak arkaly geçilýär. Şeýle mazmunly we ähmiýetli sapaklaryň döwrüň talaplaryna laýyk gelýän derejede alnyp barylmagy bolsa, magistrantlaryň has kämil bilim almagyna we alyp barýan ylmy işlerine uly badalga berýär.
Gyzylgül MOMMYÝEWA,
Türkmenistanyň Daşary işler ministrliginiň
Halkara gatnaşyklary institutynyň
Halkara žurnalistikasy fakultetiniň magistranty.