“Bilelikde okalyň!”
“Garaşsyz, baky Bitarap Türkmenistan – bedew batly at-myradyň mekany” ýylynda ÝUNESKO-nyň Bütindünýä kitap we awtorlyk hukugy güni mynasybetli geçiriljek “Bilelikde okalyň!” atly bäsleşigiň
DÜZGÜNNAMASY
Berkarar döwletiň täze eýýamynyň Galkynyşy döwründe hormatly Prezidentimiziň baştutanlygynda ylym we bilim ugurlaryny kämilleşdirmek, ýaşlaryň okamaga bolan höwesini artdyrmak, «Türkmenistanda ýokary hünär bilimini ösdürmegiň 2026 — 2052-nji ýyllar üçin Strategiýasy» hem-de ony amala aşyrmak boýunça ýerine ýetirilmeli çäreleriň 2026 — 2030-njy ýyllar üçin Meýilnamasyndan gelip çykýan wezipeleri durmuşa geçirmek maksady bilen, “Garaşsyz, baky Bitarap Türkmenistan – bedew batly at-myradyň mekany” ýylynda Türkmenistanyň Daşary işler ministrliginiň Halkara gatnaşyklary institutynyň “Parahatçylyk medeniýeti” atly ÝUNESKO klubynyň, Türkmenistanyň Magtymguly adyndaky Ýaşlar guramasynyň Berkararlyk etrap geňeşiniň guramagynda ÝUNESKO-nyň Bütindünýä kitap we awtorlyk hukugy güni mynasybetli Türkmenistanyň Daşary işler ministrliginiň Halkara gatnaşyklary institutynda Türkmenistanyň ýokary okuw mekdepleriniň talyplarynyň we magistrleriniň arasynda “Bilelikde okalyň!” atly bäsleşik geçiriler.
1. Umumy düzgünler:
Şu Düzgünnama ýokary okuw mekdepleriniň talyplarynyň we magistrleriniň arasynda geçiriljek “Bilelikde okalyň!” atly bäsleşigi guramagyň we geçirmegiň tertibini kesgitleýär.
Bäsleşigiň maksady aşakdakylardan ybaratdyr:
1. ýaşlary watansöýüjilik ruhynda terbiýelemek, kitap okamaga we bilim almaga höweslendirmek;
2. talyp ýaşlaryň ylym-bilimini, ukyp-başarnyklaryny açyp görkezmek, dünýagaraýyşlaryny artdyrmak;
3. ýaşlaryň suhangöýlik ukyplaryny kämilleşdirmek;
4. ýokary okuw mekdepleriniň arasynda bilim ulgamyndaky gatnaşyklary ösdürmek.
2. Bäsleşigiň geçiş tertibi:
2.1. Bäsleşigiň guramaçylary: Türkmenistanyň Daşary işler ministrliginiň Halkara gatnaşyklary institutynyň “Parahatçylyk medeniýeti” atly ÝUNESKO kluby, Türkmenistanyň Magtymguly adyndaky Ýaşlar guramasy.
2.2. Bäsleşik 2026-njy ýylyň 23-nji aprelinde Türkmenistanyň Daşary işler ministrliginiň Halkara gatnaşyklary institutynda gurnalýar.
2.3. Bäsleşik iňlis dilinde geçiriler.
2.4. Bu bäsleşige ýokary okuw mekdepleriniň hersinden jemi 3 (üç) sany gatnaşyjy (talyp/magistr) gatnaşyp bilýärler.
2.5. Gatnaşmak üçin her talyp/magistr dünýä edebiýatyndan saýlanan eseri boýunça çykyş tekstini ugratmaly.
2.6. Bäsleşikde talyplaryň hersi dünýä edebiýatyndan saýlap alan 1 (bir) eseri barada prezentasiýa taýýarlap (15 slaýddan köp bolmaly däl) çykyş etmeli. Her talyba çykyş etmek üçin 5 (bäş) minut wagt beriler.
3. Bäsleşigiň ýeňijilerini kesgitlemegiň we sylaglamagyň tertibi:
3.1. Bäsleşigiň ýeňijileri Garaşsyz eminler topary tarapyndan kesgitlener.
3.2. Her bir talybyň prezentasiýasy aşakdaky görkezijiler boýunça bahalandyrylar:
prezentasiýanyň mazmuny – 5 bala çenli;
sözleýiş başarnygy – 5 bala çenli;
grammatik taýdan dürs sözleýişi – 5 bala çenli;
çykyş etmek ussatlygy – 5 bala çenli.
Jemi: 20 bala çenli.
3.3. Ýeňijiler “Baş baýrak”, I, II we III orunlar boýunça yglan ediler.
3.4. Ýeňijiler degişli Diplomlar we sowgatlar bilen sylaglanarlar.
Habarlaşmak üçin:
+99312266160
tdimddk@gmail.com