Berlinde Türkmen-german işewürlik forumy geçirildi
Berkarar döwletiň täze eýýamynyň Galkynyşy döwründe ýurdumyz gün saýyn ösüşlere beslenýär.
Garaşsyz, hemişelik Bitarap Türkmenistan döwletimiziň parahatçylyk söýüjilikli hem-de dostlukly daşary syýasaty barha rowaçlanýar. Hormatly Prezidentimiz Serdar Berdimuhamedowyň parasatly ýolbaşçylygynda «Bitarap Türkmenistanyň 2022 — 2028-nji ýyllar üçin daşary syýasat ugrunyň Konsepsiýasy» üstünlikli durmuşa geçirilip, sebit we halkara derejede hyzmatdaşlygy ösdürmek boýunça köptaraplaýyn alnyp barylýan işler netijeli häsiýete eýe bolýar. Şonuň esasynda dünýä döwletleri bilen dostlukly gatnaşyklaryň gerimi has-da giňeýär.
Türkmenistan Germaniýa döwleti bilen halkara giňişlikde işjeň hyzmatdaşlyk edýärler, BMG-niň we beýleki iri halkara guramalaryň çäklerinde aýratyn ähmiýetli başlangyçlarydyr teklipleri ilerletmekde birek-biregi yzygiderli goldaýarlar.
Türkmenistan we Germaniýa Federasiýasy oňyn syýasy-diplomatik gatnaşyklary ösdürmek bilen, söwda-ykdysady ulgamda, ýangyç-energetika toplumynda we beýleki pudaklarda netijeli hyzmatdaşlyk edýärler. Bu ugurlarda bar bolan kuwwatlyklary hasaba almak arkaly umumy tagallalaryň birleşdirilmegi has netijeli hasap edilýär.
2023-nji ýylyň 20-nji noýabrynda Germaniýanyň paýtagty Berlin şäherinde türkmen wekilýeti bilen german ykdysadyýetiniň Gündogar komitetiniň başlyklyk etmeginde duşuşyk geçirildi we şonuň çäklerinde Germaniýanyň Berlin şäherinde ýerleşýän «Humboldt Carre Berlin» kongresler merkezinde türkmen-german işewürlik forumy geçirildi.
Şeýle-de Germaniýa Federatiw Respublikasynyň German ykdysadyýetiniň Gündogar komitetiniň, «Deutsche Bank AG», «Commerzbank AG», «Bank GPB International SA» banklarynyň, «AKA-Ausfuhrkreditgesellschaft GmbH», «Akcenta de GmbH, «Allianz SE, «CLAAS Global Sales GmbH», WILO SE, BMW, «Daimler Truck AG», «Siemens Healthcare GmbH», «Bayer AG, «ATLAS International GmbH» kompaniýalarynyň we başga-da dürli ugurlarda iş alyp barýan onlarça kompaniýalaryň agzalary wekilçilik etdiler.
Türkmen-german işewürlik forumy iki ýurduň arasyndaky ykdysady gatnaşyklary pugtalandyrmak üçin möhüm waka öwrüldi.
Işewür taraplar forumyň dowamynda Türkmenistanyň wekilleriniň, Germaniýanyň ykdysadyýetiniň Gündogar komitetiniň ýolbaşçylarynyň, dünýä belli nemes kompaniýalarynyň, iri bank we maliýe guramalarynyň arasynda birnäçe duşuşyklar geçirildi.
Türkmenistanyň daşary ykdysady strategiýasynyň ileri tutulýan ugurlarynyň arasynda daşary ýurtlaryň öňdebaryjy maliýe we bank guramalary bilen özara peýdaly hyzmatdaşlygy ösdürmek, sanly tehnologiýalary, elektron bank işini we bu ugurda beýleki ileri tutulýan ugurlary ornaşdyrmakda öňdebaryjy tejribäni öwrenmekde ýene bir uly ädim boldy.
Gyzylgül GURBANMUHAMEDOWA,
Türkmenistanyň Daşary işler ministrliginiň
Halkara gatnaşyklary institutynyň
Halkara ykdysady gatnaşyklary
kafedrasynyň mugallymy.