ASTANADA “MERKEZI AZIÝA: ÖZARA YNANYŞMAGYŇ ÄHMIÝETI” ATLY BILERMENLER FORUMY GEÇIRILDI
14-nji iýunda, anna güni “Merkezi Aziýa: özara ynanyşmagyň ähmiýeti” ady bilen 7-nji Merkezi Aziýa bilermenler forumy Astana şäherinde geçirildi. Bu çäre Gazagystan Respublikasynyň Prezidentiniň ýanyndaky Gazagystanyň Strategiki barlaglar instituty we BMG-nyň Merkezi Aziýa üçin öňüni alyş diplomatiýa merkezi tarapyndan guraldy. Merkezi Aziýadaky integrasiýa prosesleri ara alnyp maslahatlaşmak üçin geçirilen foruma Gazagystanyň, Gyrgyzystanyň, Özbegistanyň, Täjigistanyň we Türkmenistanyň strategiki barlaglar merkezleriniň ýolbaşçylary we hünärmenleri gatnaşdylar.
Duşuşyga gatnaşan Türkmenistanyň Daşary işler ministrliginiň Halkara gatnaşyklar institutynyň Strategiki barlaglar boýunça ylmy merkeziniň başlygy Şiri Şiriýew sebitleýin hyzmatdaşlygyň täze sikliniň başlanmagyna bagyşlanan temada giňişleýin çykyş etdi. Merkezi Aziýa sebitindäki doganlyk döwletleri elmydama özara kabul ederlikli çemeleşmeleri tapyp, ýüze çykýan meseleleri konstruktiw esasda çözüp geldiler. Bu ýörelgeler diňe bir Merkezi Aziýa sebitinde däl, eýsem ondan daşarda-da parahatçylyk, howpsuzlyk we ösüş üçin berk esas döredýär, diýip Ş.Şiriýew belledi.
Analitikler özara gatnaşyklaryň netijeliligini ýokarlandyrmak üçin bilelikdäki jemgyýetçilik barlaglaryny geçirmek, ýaşlar, demografiýa, iş orunlary, ulag koridorlary we beýleki aktual meseleler barada pikir alyşyldy. Umuman aýdylanda, çäräniň maksady Merkezi Aziýa döwletleriniň baştutanlarynyň ýakyn wagtda geçirjek Konsultatiw duşuşygy üçin amaly teklipleri taýýarlamakdan ybarat bolup durýar.
Türkmenistanyň Daşary işler ministrliginiň
Halkara gatnaşyklary institutynyň strategiki barlaglar boýunça ylmy merkezi
Bu barada şu ýerde okap bilersiňiz: