«ARKADAG ŞÄHERI – YLYMLY ÝAŞLARYŇ ŞÄHERI» ATLY ONLAÝN YLMY MASLAHAT GEÇIRILDI
2024-nji ýylyň 28-nji maýynda Türkmen döwlet binagärlik-gurluşyk institutynyň Ýaş alymlar geňeşi tarapyndan «Arkadag şäheri ylymly ýaşlaryň şäheri» ady bilen onlaýn ylmy maslahat geçirildi. Bu maslahat Milli Liderimiziň başlangyjy we Arkadagly Gahryman Serdarymyzyň taýsyz tagallalary bilen türkmen taryhynda ilkinji gezek amala aşyrylan “akylly şäher” taslamasy milli binagärligiň däplerini hem-de täze döwrüň ruhuny aýdyň açyp görkezýän öňdebaryjy çözgütleri özünde jemleýän Arkadag şäheriniň döredilmeginiň I ýyllygy mynasybetli geçirildi. Maslahata Türkmenistanyň Daşary işler ministrliginiň Halkara gatnaşyklary institutynyň we ýurdumyzyň ýokary okuw mekdepleriniň Ýaş alymlar geňeşleriniň agzalary işjeň gatnaşdylar.
Onlaýn maslahatyň dowamynda ýurdumyzyň bilim edaralarynyň Ýaş alymlar geňeşiniň ýolbaşçylary we wekilleri çykyş etdiler. Maslahatda çykyş edenler «Pähim-paýhas ummany Magtymguly Pyragy» ýylynda Arkadag şäheriniň ähmiýeti, şol bir wagtyň özünde täze şäheriň köçelerinde jemgyýetçilik ulagynyň ekologiýa taýdan arassa görnüşleriniň hereket etmegi, bu künjekde amatly howa gurşawynyň saklanmagy, täze şäherde milli saglygy goraýyş ulgamynyň döwrebap binalarynyň gurlandygy barada giňişleýin gürrüň berdiler. Şeýle hem Arkadag şäheriniň esasy binalarynyň hatarynda Berdimuhamet Annaýew adyndaky Arkadag şäher mugallymçylyk orta hünär okuw mekdebiniň, Gurbanguly Berdimuhamedow adyndaky çagalar sagaldyş-dikeldiş merkeziniň, Saçly Dursunowa adyndaky Arkadag şäher lukmançylyk orta hünär okuw mekdebiniň, çagalar baglarynyň hem-de umumybilim orta mekdepleriň, lukmançylyk edaralarynyň, sport toplumlarynyň möhüm orun eýeleýändigini dogrusynda belläp geçdiler. Maslahatyň ahyrynda ýaşlaryň ylmy gözlegler bilen meşgullanmagy üçin ähli mümkinçilikleri döredip berýän Gahryman, Alym Arkadagymyza, Arkadagly Gahryman Serdarymyza alkyş sözleri aýdyldy.
Gülsenem HOMMADOWA,
Türkmenistanyň Daşary işler ministrliginiň
Halkara gatnaşyklary institutynyň
Halkara hukugy we deňeşdirme hukuk öwreniş
kafedrasynyň öwreniji mugallymy.