Arkadag şäheri: ykdysady ösüşiň ýoly bilen
Arkadag Serdarly bagtyýar ýaşlar ýylynda hormatly Prezidentimiziň baştutanlygynda hususy pudagy ösdürmek, ýurdumyzy senagat taýdan ösen döwletleriň hataryna goşmak ugrunda uly tagallalar edilýär. Bu işler ýurdumyzyň bank ulgamynda hem mynasyp alnyp barylýar. Sebitiň nusgalyk «akylly» şäheri bolan Arkadag şäheriniň banklarynda hem bu ugurda wajyp işler amala aşyrylýar.
Häzirki wagtda Arkadag şäherinde Maliýe we ykdysadyýet toplumynyň bölümi, Merkezi bankyň, «Daýhanbank», «Türkmenistan», «Halkbank» we «Senagat» täjirçilik banklarynyň şahamçalary ilata hyzmat edýär. Täze şäheriň degişli bank edaralary dürli görnüşli hyzmatlaryny halkymyza hödürleýär.
Hormatly Prezidentimiziň alyp barýan parasatly syýasaty ýurdumyzda daşarky bazarlarda bäsdeşlige ukyply, içerki bazarlarda azyk bolçulygyny üpjün edýän hem-de daşyndan getirilýän harytlaryň ornuny tutýan önümleriň öndürilişini üstünlikli artdyrmaga, ýurdumyzyň eksport kuwwatyny ýokarlandyrmaga mümkinçilik berýär. Arkadag şäherindäki bank ulgamlarynda hem zerur bolan ýerli çig mallary öndürmek üçin hem-de beýleki kiçi göwrümli karzlary bermek işini döwrebap derejede alyp barýarlar. Bu karzlaryň üsti bilen raýatlarymyz üçin kiçi telekeçilik işini ýola goýmaga mümkinçilik döredilýär.
Sazlaşykly ösýän ýurdumyzda alnyp barylýan döwlet syýasaty türkmen halkynyň bagtyýar we abadan durmuşda ýaşamagyna gönükdirilendir. Türkmen halkynyň abadançylygy, rowaçlygy ugrunda ýadawsyz tagallalary edýän, ýurdumyzyň halkara abraýyny dünýä jemgyýetçiligine ykrar etdirmegi başaran Gahryman Arkadagymyzyň, hormatly Prezidentimiziň janlary sag, il-ýurt bähbitli we umumadamzat ähmiýetli alyp barýan işleri mundan beýläk hem rowaç bolsun!
Ýupar EGIRJÄÝEWA,
Türkmenistanyň Daşary işler ministrliginiň
Halkara gatnaşyklary institutynyň
Halkara ykdysady gatnaşyklary fakultetiniň 2-nji ýyl talyby.