Arkadag Binasy
Goja taryha nazar aýlasak, ençeme täze şäherleriň, galalaryň gurulmagynyň meşhur şahsyýetleriň tagallasy, atlary bilen baglanşykly bolandygyny göz ýetirýäris. Gadymy Ahalyň ýaýlasynda, Köpetdagyň eteginde Arkadag şäheriniň taslamasyny düzmek, ony gurmak Gahryman Arkadagymyzyň irginsiz aladasy, taýsyz tagallasy bilen baglanyşyklydyr. Hut şonuň üçin hem halkymyz bu täze şäheriň “Arkadag şäheri” diýlip atlandyrylmagyny tüýs ýürekden oňlady.
Täze şäheriň keşbinde milli binagärligiň iň gowy däpleri binagärlik we bezeg babatda häzirki zaman meýilleri bilen sazlaşykly utgaşýar. Bu ýerde halkara ölçeglere, şol sanda tebigaty goramak ulgamyndaky ölçeglere laýyk gelýän toplumlaýyn infrastrukturanyň döredilmegi şäher ýaşaýjylary üçin oňaýly ýaşaýyş-durmuş şertleri bilen üpjün edýär.
Ýurdumyzyň gözel ýerleriniň birinde – Arkadag şäherinde heýkeltaraşlyk sungatyny özünde jemleýän birnäçe binalaryň döredilmegi şäheriň görküne görk goşýar. Şol ajaýyp binalaryň biri hem türkmen halkynyň Milli Lideri, Türkmenistanyň Halk Maslahatynyň Başlygy Gurbanguly Berdimuhamedowyň ahalteke bedewine atlanan aýgytly keşbi şekillendirip duran “Arkadag Binasy”. Munuň özi ýurdumyzyň ösüşiň täze belentliklerine uzaýan batly gadamlaryny alamatlandyrýar. Binanyň umumy beýikligi 43 metrdir. Onuň suw çüwdürimleriniň diametri 65 metre barabardyr. Sütüniň ýokarsyna görk berýän altyn çaýylan bugdaý sünbülleri ýurdumyzdaky berekediň, bolçulygyň sungat dilindäki beýanydyr.
Watanymyza çäksiz söýgi bilen hyzmat etmegi hem-de türkmenistanlylaryň abadançylygy barada ýadawsyz alada etmegi bilen, Gahryman Arkadagymyz halkymyzyň çuňňur hormat-sarpasyna, ynamyna mynasyp boldy. Şäheriň merkezi seýilgähinde ýerleşdirilen “Arkadag Binasyna” Mejlisiň kararyna laýyklykda, türkmen halkynyň Milli Lideri Gurbanguly Berdimuhamedowyň adynyň dakylmagy munuň aýdyň subutnamasydyr.
Resul GYLYJOW,
Türkmenistanyň Daşary işler ministrliginiň
Halkara gatnaşyklary institutynyň
Halkara ykdysady gatnaşyklary fakultetiniň
II ýyl talyby.