ÄNEW MEDENIÝETINE BAGYŞLANAN YLMY-DÖREDIJILIK MASLAHATY GEÇIRILDI
2024-nji ýylyň 3-nji dekabrynda Türkmenistanyň Daşary işler ministrliginiň Halkara gatnaşyklary institutynda Türkmenistanyň hemişelik Bitaraplygynyň 29 ýyllygy mynasybetli Türkmenistanyň Daşary işler ministrliginiň Halkara gatnaşyklary institutynyň Jemgyýeti öwreniş ylymlary kafedrasynyň “Paýhas we parasat’’ ylmy gurnagy tarapyndan «Hormatly Prezidentimiziň «Änew– müňýyllyklardan gözbaş alýan medeniýet» atly kitabynda ata-babalarymyzyň dünýäniň gadymy medeniýetleriniň ösmegindäki orny barada» atly ylmy- döredijilik maslahaty geçirildi.
YImy-döredijilik maslahatyna Türkmenistanyň Daşary işler ministrliginiň Halkara gatnaşyklary institutynyň, Magtymguly adyndaky Türkmen döwlet uniwersitetiniň professor-mugallymlary, talyp ýaşlary we Ýaş diplomatlaryň mekdebiniň agzalary gatnaşdylar.
Ylmy-döredijilik maslahatynyň dowamynda professor-mugallymlar hormatly Prezidentimiziň «Änew–müňýyllyklardan gözbaş alýan medeniýet» atly kitabynda ata-babalarymyzyň dünýäniň gadymy medeniýetleriniň ösmegindäki orny, Änew medeniýetiniň öwrenilişiniň taryhy barada talyp ýaşlara we Ýaş diplomatlaryň mekdebiniň agzalaryna ylmy esasda giňişleýin gürrüň berdiler.
Ylmy-döredijilik maslahatynyň dowamynda talyp ýaşlara we mekdep okuwçylaryna Änew medeniýetine hem-de onuň taryhyna degişli soraglar berildi. Soraglara has köp dogry jogap bermegi başaran talyplar we mekdep okuwçylary gymmat bahaly sowgatlar bilen sylaglandylar.
Ylmy-döredijilik maslahatynyň ahyrynda Ýaş diplomatlaryň mekdebiniň agzalary bolan mekdep okuwçylar we talyp ýaşlar özlerini gyzyklandyrýan sowallar bilen halypa mugallymlara ýüzlenip, olara anyk jogaplary aldylar.
Güljemal ORAZOWA,
Türkmenistanyň Daşary işler ministrliginiň
Halkara gatnaşyklary institutynyň
Halkara gatnaşyklary fakultetiniň I ýyl talyby.