«Akylly» şäheriň täze üstünligi
Gahryman Arkadagymyzyň başlangyjy bilen başy başlanan we häzirki wagtda hormatly Prezidentimiz tarapyndan üstünlikli dowam etdirilýän Arkadag şäheriniň gurluşygy gojaman Köpetdagyň eteginde özboluşly şäheriň emele gelmegine şert döredýär. Mälim bolşy ýaly, bu ýerde gurluşygy iki tapgyrda alyp barmak meýilleşdirilip, häzirki wagtda onuň ikinji tapgyry dowam edýär. Sebitde «akylly» şäher diýlip ykrar edilen Arkadag şäherinde alnyp barylýan şeýle işler dünýä jemgyýetçiliginiň ünsüni hem özüne çekmegi başardy. Arkadag şäheri Ýewropanyň Hil barlaglary boýunça jemgyýetiniň hil boýunça baýragyna,«Hil saýlawy ─ 2024» nyşany bolan «Diamond» derejesine mynasyp boldy. Şeýle hem Arkadag şäheriniň lukmançylyk klasteriniň önümleriniň haryt nyşanynyň Bütindünýä Intellektual Eýeçilik Guramasynyň Halkara býurosynyň degişli güwänamasy bilen tassyklanmagy begenjimizi goşalandyran wakalar boldy. Bu ýerde hereket edýän elektrobuslar, elektrotaksiler ýurdumyzyň ekologiýanyň goragyna uly üns berýändigini, bu ugurda ençeme işleri alyp barýandygyny äşgär etdi. Şeýle-de, Arkadag şäheriniň mynasyp bolan bu baýraklary halkara derejesinde abraýly baýraklardygy, onuň gowşurylmagy gysga wagtda bina edilen ajaýyp şähere gyzyklanmanyň uludygyny alamatlandyrýar. Galyberse-de, üstümizdäki ýylyň sentýabrynda geçirilen Türkmenistanyň Halk Maslahatynyň mejlisinde «Arkadag şäherini 2024 — 2052-nji ýyllarda ösdürmegiň Konsepsiýasynyň» hem möhüm ähmiýete eýedigini bellemek gerek. 2023-nji ýylyň 24-nji martyndan güýje girizilen «Arkadag şäheri hakynda» Türkmenistanyň Kanunynda Arkadag şäheri üçin «döwlet ähmiýetli şäher» diýen aýratyn hukuk ýagdaýynyň bellenilmegi hem bu şäheriň ýurdumyzyň ösüşlerine oňaýly täsirini ýetirendiginden habar berýär. Häzirki wagtda bu ajaýyp şäherde bagtly durmuş höküm sürýär. Täze bilim edaralarynyň, durmuş maksatly binalaryň halka hyzmat etmegi ildeşlerimiziň abadan durmuşyny kepillendirýär. Üstümizdäki «Pähim-paýhas ummany Magtymguly Pyragy» ýylyndaky guralan medeniýet hepdeliginiň hem Arkadag şäherinde geçirilmegi medeniýet, sungat işgärlerine toý ruhuny bagyşlady. Hepdelige gatnaşyjylar Änew medeniýeti, Jeýtun medeniýeti diýlip atlandyrylyşy ýaly bu şähere hem Arkadag medeniýeti diýip ýokary baha berdiler. Şeýle halkara sylaglara mynasyp bolan, sebitde deňi-taýy bolmadyk Arkadag şäheriniň bu gazanan täze üstünligi bilen Gahryman Arkadagymyzy, hormatly Prezidentimizi we türkmen halkyny tüýs ýürekden gutlaýarys. Şeýle baýraklaryň höwrüniň köp bolagyny arzuw edýäris.
Baýnazar BAÝHANOW,
Türkmenistanyň Daşary işler ministrliginiň
Halkara gatnaşyklary institutynyň
Halkara
žurnalistikasy fakultetiniň I ýyl talyby.