Ak şäherimiz Aşgabadyň döredilen gününe bagyşlanan döredijilik duşuşygy
2023-nji ýylyň 19-njy maýynda Erkin döredijilik mekanynda Türkmen döwlet neşirýat gullugynyň we “Aşgabat” gazetiniň redaksiýasynyň bilelikde guramagynda Aşgabat şäheriniň güni mynasybetli döredijilik işgärleriniň duşuşygy geçirildi. Ak mermerli paýtagtymyzyň döredilen gününe bagyşlanylyp guralan bu duşuşyga ýurdumyzyň halypa žurnalistleri, ýazyjy-şahyrlary, çeper döredijilik bilen gyzyklanýan ýaşlar, Magtymguly adyndaky Türkmen döwlet uniwersitetiniň, Halkara ynsanperwer ylymlary we ösüş uniwersitetiniň, Türkmenistanyň Daşary işler ministrliginiň Halkara gatnaşyklary institutynyň, Türkmen döwlet bedenterbiýe we sport institutynyň, Türkmen döwlet medeniýet institutynyň žurnalistika hünäri boýunça bilim alýan talyplary gatnaşdylar.
Ýokary guramaçylyga eýe bolan duşuşygyň dowamynda çykyş eden halypa žurnalistler öz çykyşlarynda gözel paýtagtymyzyň taryhy we häzirki wagtdaky keşbini täsirli maglumatlar esasynda beýan etdiler. Çykyşlarda bellenilişi ýaly, Aşgabat adamzat taryhynyň dürli döwürlerinde özüniň binagärlik gurluşy, medeni hyzmat ediş we dynç alyş ugurlary boýunça dünýäde iň owadan we döwrebap şäherleriň biri bolupdyr. Maglumatlara görä, ajaýypdan üýtgeşik binagärlik gurluşy bilen öz taryhynyň dürli döwürlerinde göreni haýrana goýan Aşgabat şäherimiziň döreýşi gadymy Parfiýa döwletini esaslandyryjy Ärsak şanyň ady bilen aýrylmaz baglanşykly bolupdyr.
Şeýle-de, çykyşlaryň dowamynda mermer paýtagtymyzyň häzirki ajaýyp şähergurluşyk-binagärlik keşbi we onuň Ginnesiň Bütindünýä rekordlar kitabynda hem mynasyp orun alandygy, sebitde we dünýäde möhüm meseleleriň çözülýän, ylalaşyklaryň gazanylýän, halklary dostlaşdyrýan şäherdigi baradaky maglumatlar aýratyn buýsanç bilen nygtaldy. Söz ussatlarynyň gatnaşmagynda halypa-şägirtlik duşuşyklarynyň yzygiderli geçirilmegi ýaş žurnalistleriň maglumat gorunyň baýlaşmagynda, döredijilik dünýäsine bolan höwesiniň artmagynda görelde mekdebi bolup durýar.
Duşuşygyň ahyrynda paýtagtymyz Aşgabady dünýä tanatmakda alyp barýan dürli maksatnamalaýyn işleri üçin Gahryman Arkadagymyza, hormatly Prezidentimize çäksiz sagbolsunlar aýdyldy.
Jennet OMAROWA,
Türkmenistanyň Daşary işler ministrliginiň
Halkara gatnaşyklary institutynyň
Halkara žurnalistikasy fakultetiniň IV ýyl talyby.