5-nji oktýabr – Bütindünýä mugallymlar güni
Mugallym pedagogiki başarnyklaryna eýe bolmaly we işini gowy görmeli,
okuwçylarynyň garaşsyz pikirlerini oýarmaly, olary umumy bähbidiň
aladasyny
edýän işjeň adamlar hökmünde taýýarlamaly.
Ýan Amos
Mugallymçylyk käri iň gadymy kärleriň biri hasaplanylýar. Ilkinji bilim edaralary miladydan öňki IV-V müňýyllykda Gadymy Gündogar ýurtlarynda ýüze çykypdyr. Bu ugurda meşhur çeh alymy Ýan Amos Komenskiý ylym hökmünde pedagogikany esaslandyryjydyr. Ol taryhda «Pedagogikanyň atasy» diýip tanalýar.
ÝUNESKO-nyň çözgüdi esasynda 1994-nji ýyldan bäri her ýylyň 5-nji oktýabry Bütindünýä mugallymlar güni hökmünde giňden bellenilýär. Mugallymlaryň hünär derejesini ýokarlandyrmak we iş şertlerini gowulandyrmak BMG-niň Durnukly ösüş maksatnamasynyň esasy meseleleriniň biridir. Her ýylyň 5-nji oktýabrynyň Bütindünýä mugallymlar güni diýlip yglan edilmegine ÝUNISEF, BMG-niň Ilat gaznasy we beýleki guramalar hem goşuldy. Bu baýram mugallymlaryň jemgyýetde we ählumumy ösüşde eýeleýän ornuna ünsi çekmek üçin niýetlenendir.
ÝUNESKO üçin esasy ileri tutulýan ugurlaryň biri ýokary hünär derejeli mugallymlary taýýarlamak işini giňeltmekdir.
ÝUNESKO-nyň mugallymlary taýýarlamak işi dört esasy ugra gönükdirilýär:
- mugallymçylyk hünäri bilen baglanyşykly halkara düzgünlere gözegçilik etmek;
- mugallymçylygyň strategiýasyny işläp düzmekde agza döwletlere goldaw bermek;
- okatmagyň we öwretmegiň hilini ýokarlandyrmak üçin mümkinçilikleri ösdürmek;
- maksatlaryň we wezipeleriň durmuşa geçirilmegi üçin bilim berlişini ýokarlandyrmak.
Halkara mugallymlar güni mugallymçylyk hünärini ösdürmek, bu ugur babatda geçmişdäki gazanylan üstünliklerden ruhlanmak we galan päsgelçilikleri ýeňip geçmegiň ýollaryny öwrenmek maksady bilen BMG-niň ÝUNESKO guramasynyň howandarlygynda bütindünýä jemgyýetçiligi belläp geçýär.
Begmuhammet ATAÝEW,
Türkmenistanyň Daşary işler ministrliginiň
Halkara gatnaşyklary institutynyň
Halkara hukugy fakultetiniň 1-nji ýyl talyby.