31-nji oktýabr – Bütindünýä şäherler güni
Däp bolşy ýaly, her ýylyň 31-nji oktýabrynda Birleşen Milletler Guramasynyň Baş Assambleýasynyň 2014-nji ýyldaky 68/239 belgili Karary esasynda Bütindünýä şäherler güni giňden bellenilýär. Bu günüň döredilmeginiň esasy sebäbi halkara jemgyýetçiliginiň ünsüni dünýäde parahatçylyk meselelerine çekmeklige gönükdirilendir. BMG-niň maglumatlaryna görä, häzirki wagtda dünýä ilatynyň ýarysyndan gowragy şäherlerde ýaşaýar, 2050-nji ýyla çenli bu görkezijiniň 68 göterime çenli ýokarlanmagyna garaşylýar. BMG-ne agza ýurtlar şäherleriň ösdürilmegine degişli täze maksatnamalary kabul etdiler. Şonuň netijesinde, ýaşaýyş jaý, daşky gurşawy goramak, howanyň üýtgemegi, infrastruktura, esasy hyzmatlar, azyk howpsuzlygy, saglyk, bilim ýaly ugurlarda özboluşly ösüş gazanmak göz öňünde tutulýar. Bütindünýä şäherler gününiň şygary “Gowy şäher, has gowy durmuş” diýlip atlandyrylýar. Bu senede geçirilýän çäreler şäher ösüşiniň iň gowy tejribesine we şäherleşme bilen baglanyşykly anyk meselelere bagyşlanandyr. Oktýabr aýynyň her birinji duşenbe gününde Bütindünýä ýaşaýyş güni hem goşmaça bellenilýär.
Bu baýramçylyk gününde Garaşsyz hem baky Bitarap Türkmenistanyň ak mermerli paýtagty bolan Aşgabadyň Merkezi Aziýanyň merjen şäheri diýlip ykrar edilendigini ýatlamak hem ýakymlydyr. 2013-nji ýylyň 25-nji maýynda Aşgabat ak mermerli binalaryň has köp jemlenen şäheri hökmünde Ginnesiň rekordlar kitabyna girizildi. Türkmenistanyň Prezidentiniň degişli Kararyna laýyklykda bolsa, 2013-nji ýyldan başlap, 25-nji maý Aşgabat şäheriniň güni hökmünde toý-dabaralara beslenilip geçirilýär.
Jahan ŞUKUROWA,
Türkmenistanyň Daşary işler ministrliginiň
Halkara gatnaşyklary institutynyň
Halkara gatnaşyklary fakultetiniň I ýyl talyby.