18-NJI FEWRAL — TÜRKMENISTANYŇ DIPLOMATIK IŞGÄRLERINIŇ GÜNI
Bilşimiz ýaly, her ýylyň 18-nji fewralynda ýurdumyzda Türkmenistanyň diplomatik işgärleriniň güni giňden bellenilýär. Bu sene 2009-njy ýylyň fewralynda Gahryman Arkadagymyzyň Permanyna laýyklykda döredilip, döwletimiziň daşary syýasatyny üstünlikli durmuşa geçirýän diplomatlaryň alyp barýan işlerine goýulýan hormatdan nyşandyr. Şol mynasybetli hem dürli dabaraly çäreler, maslahatlar we duşuşyklar geçirilýär.
Türkmenistanyň daşary syýasaty ählumumy hem-de sebit derejesindäki meseleleriň diňe parahatçylykly, syýasy-diplomatik serişdeler arkaly çözülmegine esaslanýar. Bu ýörelge halkara hyzmatdaşlygy pugtalandyrmaga, ýurtlaryň we halklaryň arasynda dost-doganlyk gatnaşyklary ösdürmäge, medeniýetleriň özara baýlaşmagyna gönükdirilendir. “Bitarap Türkmenistanyň daşary syýasat ugrunyň 2022–2028-nji ýyllar üçin Konsepsiýasynda” hoşniýetlilik, özara bähbitlilik, deňhukukly hyzmatdaşlyk we döredijilikli çemeleşme milli diplomatiýanyň baş ýörelgeleri hökmünde kesgitlenendir.
Berkarar döwletiň täze eýýamynyň Galkynyşy döwründe Türkmenistanyň daşary syýasaty täze ösüş tapgyryna gadam basdy. Arkadagly Gahryman Serdarymyzyň ýolbaşçylygynda ýurdumyz dünýäniň 159 döwleti bilen diplomatik gatnaşyklary ýola goýup, 100-den gowrak ýurt bilen söwda-ykdysady hyzmatdaşlygy alyp barýar. Bu bolsa ýurdumyzyň halkara giňişlikdäki abraýynyň barha artýandygyny görkezýär.
Türkmenistanyň “Açyk gapylar” syýasaty üstünlikli amala aşyrylyp, halkara ykdysady hyzmatdaşlygy ösdürmek, energetika howpsuzlygyny üpjün etmek, ekologiýa meselelerini çözmek, ulag-üstaşyr geçelgelerini giňeltmek ýaly möhüm ugurlarda netijeli işler alnyp barylýar. Döwlet Baştutanymyzyň halkara giňişlikde öňe sürýän başlangyçlary dünýä jemgyýetçiligi tarapyndan goldanylýar we ählumumy durnukly ösüşe gönükdirilýär.
Daşary syýasatyň durmuşa geçirilmeginde diplomatik gulluk aýratyn orun eýeleýär. “Diplomatik gulluk hakynda” Türkmenistanyň Kanunyna laýyklykda, diplomatik gulluk döwlet gullugynyň daşary syýasaty amala aşyrmak, halkara gatnaşyklarynda ýurdumyzyň we onuň raýatlarynyň kanuny bähbitlerini goramak bilen baglanyşykly görnüşidir. Diplomatlar ýurdumyzyň daşary ýurtlardaky ilçihanalarynda we konsullyk edaralarynda, şeýle hem Daşary işler ministrliginiň merkezi diwanynda ýokary jogapkärçilik bilen hyzmat edýärler.
Milli diplomatiýanyň geljekki nesillerini taýýarlamak maksady bilen Türkmenistanyň Daşary işler ministrliginiň Halkara gatnaşyklary institutynyň talyplary daşary ýurtlardaky ilçihanalarda tejribelik geçip, halkara gatnaşyklaryň aýratynlyklary bilen tanyşýarlar. Soňky ýyllarda institutda birnäçe okuw we ylmy merkezleriň döredilmegi diplomatik bilim ulgamynyň döwrebaplaşdyrylýandygyny görkezýär.
Türkmenistanyň diplomatik işgärleriniň güni — bu parahatçylyk, dostluk we hyzmatdaşlyk ýörelgelerine wepalylygyň nyşanydyr. Türkmen diplomatlary ýurdumyzyň halkara abraýyny berkitmek, dünýä döwletleri bilen netijeli gatnaşyklary ösdürmek ugrunda yhlasly zähmet çekýärler.
Kemal BAÝRAMOW,
Türkmenistanyň Daşary işler ministrliginiň
Halkara gatnaşyklary institutynyň
Halkara hukugy fakultetiniň
II ýyl talyby.