YKDYSADY DIPLOMATIÝA UGRY BOÝUNÇA OKUW SAPAGY
2024-nji ýylyň 11-nji noýabrynda Türkmenistanyň Daşary işler ministrliginiň Halkara gatnaşyklary institutynda Türkmenistanyň diplomatiýasynyň möhüm ugurlary boýunça okuw merkeziniň «Ykdysady diplomatiýa» ugry boýunça nobatdaky okuw sapagy guraldy. Oňa Türkmenistanyň Daşary işler ministrliginiň Halkara gatnaşyklary institutynyň talyp ýaşlary gatnaşdy. Okuw sapagy «Ykdysady howpsuzlygy üpjün etmegiň syýasy-diplomatik usullary» atly temadan geçirildi we sapagy institutyň Halkara gatnaşyklary we diplomatiýa kafedrasynyň uly mugallymy, filosofiýa ylymlarynyň kandidaty Begenç Karaýew alyp bardy.
Sapagyň dowamynda halypa mugallym dünýäde parahatçylygy gorap saklamak we howpsuzlygy üpjün etmek meselesi adamzadyň şu günki we geljekki ösüşini kesgitleýän wezipedigini belledi. Şeýle hem halkara gatnaşyklarynyň dünýä bileleşiginiň esasy gatnaşyjylary bolan döwletleriň syýasy-diplomatik, söwda-ykdysady we beýleki ugurlar boýunça özara gatnaşyklarynyň jemidigi hakynda nygtady.
Täze maglumatlara baý bolan bu sapagyň dowamynda Türkmenistanyň daşary syýasatynyň ösüşi barada talyp ýaşlar halypa mugallyma özlerini gyzyklandyrýan sowallar bilen ýüzlendiler. Bu okuw sapagy talyplar üçin örän täsirli boldy.
Gyzylgül GURBANMUHAMEDOWA,
Türkmenistanyň Daşary işler ministrliginiň
Halkara gatnaşyklary institutynyň
Halkara ykdysady gatnaşyklary kafedrasynyň mugallymy.