2024-nji ýylyň 18-nji dekabrynda Türkmenistanyň Daşary işler ministrliginiň Halkara gatnaşyklary institutynda «Parahatçylygyň ýaş çaparlary» atly akyl-paýhas bäsleşiginiň «Bitarap Türkmenistanyň parahatçylygy dörediji diplomatiýasy: netijeli hyzmatdaşlygyň we durnukly ösüşiň ygtybarly guraly» atly umumy şygar astynda geçirilýän IV möwsüminiň III saýlama oýny geçirildi. Bu gezekki oýun «Halkara gatnaşyklarynda Bitaraplyk syýasaty: Parahatçylygy dörediji dialogyň we öňüni alyş diplomatiýasynyň kuwwaty» atly tema bagyşlandy.
Bäsleşigiň nobatdaky tapgyryna Aşgabat şäheriniň Saparmyrat Türkmenbaşy adyndaky umumy bilim berýän mekdep-internatynyň 12-nji synp okuwçylary Abdyrahym Aknyýazow, Atajan Atadurdyýew, Mamajan Muhammetnazarowa, Süleýman Nurýagdyýew, Mary welaýatynyň Murgap etrabynyň 19-njy orta mekdebiniň 12-nji synp okuwçysy Mergen Ataýew, Aşgabat şäheriniň 52-nji orta mekdebiniň 12-nji synp okuwçysy Resul Baýmyradow, Aşgabat şäheriniň iňlis dilini çuňlaşdyryp öwredýän ýöriteleşdirilen 135-nji orta mekdebiniň 12-nji synp okuwçysy Leýla Bazarowa, Daşoguz welaýatynyň Daşoguz şäheriniň ýöriteleşdirilen 26-njy orta mekdebiniň 12-nji synp okuwçysy Süleýman Gutlymyradow dagy gatnaşdylar.
Şeýle hem bu gezekki akyl-paýhas bäşleşigine Magtymguly adyndaky Türkmen döwlet uniwersitetiniň Türkmenistanyň taryhy kafedrasynyň mugallymy Toýly Hommyýew, Türkmenistanyň Daşary işler ministrliginiň Halkara gatnaşyklary institutynyň Halkara gatnaşyklary we diplomatiýa kafedrasynyň uly mugallymy, filosofiýa ylymlarynyň kandidaty Begenç Karaýew hem-de Türkmenistanyň Ylymlar akademiýasynyň Magtymguly adyndaky Dil, edebiýat we milli golýazmalar institutynyň tekstologiýa we edebi miras bölüminiň uly ylmy işgäri Gyzylgül Tagandurdyýewa adalatly eminlik etdiler.
Bäsleşikde ýaş çaparlaryň öz ykballaryny baglajak ugry bolan diplomatiýa we ata Watanymyzyň alyp barýan hoşniýetli goňşuçylyk, dost-doganlyk we özara bähbitlilik ýaly gymmatlyklara esaslanýan baky Bitaraplyk syýasaty bilen bagly ençeme sowallar berildi. Däp bolşy ýaly, her bäsleşikde öz ugurtapyjylygyny, ukyp-başarnygyny görkezip bilen öňe saýlanýar. Akyl-paýhas bäsleşiginiň nobatdaky saýlama tapgyrynda bolsa, Aşgabat şäheriniň 52-nji orta mekdebiniň 12-nji synp okuwçysy Resul Baýmyradow hem-de Aşgabat şäheriniň Saparmyrat Türkmenbaşy adyndaky umumy bilim berýän mekdep-internatynyň 12-nji synp okuwçysy Atajan Atadurdyýew ýeňiş gazandy.
Elbetde, bu bäsleşik hem bolsa, ol diňe bir ýeňijiler üçin däl, eýsem, oňa gatnaşyjylaryň ählisinde-de uly täsir galdyrýar. Bäsleşige gatnaşyjylar geljekki hünärine uzaýan menzillere ilkinji ädimleri ädýärler. Şeýle hem, «Parahatçylygyň ýaş çaparlary» akyl-paýhas bäsleşiginiň institutyň okuw binasynda geçirilmegi hem aýratyn mazmuna eýedir. Çünki bu oňa gatnaşýan okuwçylaryň talyplyk dünýäsine bolan hyjuwyny artdyrýar.
Aýnur HUDAÝBERGENOWA,
Halkara žurnalistikasy fakultetiniñ III ýyl talyby.
Çeşme: