Türkmenistan — Pakistan: ynamly geljege tarap
Türkmenistan we Pakistan Yslam Respublikasynyň arasyndaky diplomatik gatnaşyklary 1992-nji ýylyň 9-njy maýynda ýola goýuldy. Pakistan Türkmenistanyň Garaşsyzlygyny ykrar eden ilkinji ýurtlaryň biri bolmak bilen, ol Türkmenistan tarapyndan öňe sürlen birnäçe başlangyçlaryň, şol sanda BMG-niň Baş Assambleýasynyň “Türkmenistanyň hemişelik bitaraplygy hakynda” we “Halkara bitaraplyk güni hakynda” kararnamalarynyň awtordaşy bolup çykyş etdi. Ikitaraplaýyn gatnaşyklaryň ilkinji günlerinden ýola goýlan söwda-ykdysady we medeni-ynsanperwer hyzmatdaşlygy şu günlerde özüniň ýokary derejesini görkezýär. Türkmen-pakistan gatnaşyklarynda hyzmatdaşlygyň dürli ugurlaryny ösdürmek üçin mümkinçilikler ýylsaýyn artýar.
Türkmenistan-Owganystan-Pakistan-Hindistan (TOPH) gazgeçirijisiniň, Türkmenistan-Owganystan-Pakistan ugry boýunça elektrik energiýasynyň geçirijisiniň we optiki-süýümli aragatnaşyk ulgamynyň gurluşygy ýaly meýilnamalaýyn taslamalaryň durmuşa geçirilmegi iki ýurduň ykdysady hyzmatdaşlygyny pugtalandyrmak üçin geçirilýän çäreleriň netijesidir. Bu taslamalaryň durmuşa geçirilmegi energetika howpsuzlygyny we onuň durnuklylygyny üpjün eder. Sebitde söwda dolanyşygyny ýokarlandyrmak we harytlaryň erkin daşalmagy üçin Türkmenistan-Owganystan-Pakistan ulag-üstaşyr geçelgesini we demir ýollaryny, şeýle hem Merkezi Aziýa—Ýakyn Gündogar transport we tranzit geçelgesini gurmak ýaly geljege uzaýan taslamalarynyň ara alnyp maslahatlaşylmagy iki ýurduň arasyndaky dostluk-doganlyk gatnaşyklaryň we birek-birege bolan ynamyň aýdyň subutnamasydyr.
Ýeri gelende aýtsak, iki ýurduň arasyndaky ynsanperwer we gadymdan gelýän ruhy-medeni gatnaşyklar döwletara hyzmatdaşlygy giňeltmek üçin esas bolup durýar. Şeýle-de ylym-bilime, bank ulgamyna, derman senagatyna, maşyn gurluşygyna we söwda gatnaşyklaryna bolan ikitaraplaýyn gyzyklanmalar uly ähmiýete eýedir. Häzirki wagtda Türkmenistan we Pakistan köptaraplaýyn diplomatiýanyň esasynda, ýagny BMG-niň we Yslam Hyzmatdaşlyk Guramasynyň we beýleki abraýly guramalaryň çäklerinde netijeli gatnaşyklary alyp barýarlar. Şu ýylyň maý aýynda türkmen-pakistan diplomatik gatnaşyklarynyň ýola goýulmagynyň 30 ýyllygy mynasybetli Türkmenistanyň Yslamabatdaky ilçihanasynda okuw maslahaty geçirildi. Oňa iki ýurduň görnükli syýasatçylary we jemgyýetçilik guramalarynyň ýolbaşçylary gatnaşdylar. Okuw maslahatyna gatnaşyjylar öz çykyşlarynda türkmen-pakistan hyzmatdaşlygyny ilerletmegiň wajyp wezipeleriň biridigini nygtadylar.
Maral KARLYÝEWA,
Türkmenistanyň Daşary işler ministrliginiň
Halkara gatnaşyklary institutynyň
Halkara gatnaşyklary fakultetiniň I ýyl talyby.