Türkmen — koreý medeni gatnaşyklary pugtalandyrylýar
1992-nji ýylyň 7-nji fewralynda Aziýa — Ýuwaş ummany sebitindäki iri hyzmatdaşlaryň biri bolup durýan Koreýa Respublikasy bilen ýurdumyzyň arasyndaky diplomatik gatnaşyklar ýola goýuldy. Şondan bäri geçen döwrüň içinde deňhukukly we özara bähbitli hyzmatdaşlyk ösdürilýär we işjeňleşýär. Iki döwletiň arasyndaky hyzmatdaşlyk ikitaraplaýyn görnüşde hem, halkara guramalarynyň çäklerinde hem giň gerime eýe bolýar. 2007-nji ýylda Aşgabatda Koreýanyň, 2013-nji ýylda bolsa Seulda Türkmenistanyň ilçihanalarynyň açylmagy iki dostlukly döwletiň diplomatik gatnaşyklarynyň taryhynda möhüm ädimleriň biri boldy. Türkmenistan döwletimiz Koreýa Respublikasy bilen gatnaşyklara uly ähmiýet berip, ikitaraplaýyn syýasy-diplomatik, söwda-ykdysady, ýokary tehnologiýaly senagat, ulag-aragatnaşyk, ylym we medeniýet, sport ýaly ugurlar boýunça netijeli hyzmatdaşlygyň ösdürilmegini üns merkezinde saklaýar.
2022-nji ýylyň 29-njy noýabrynda Seul şäherinde Türkmen halkynyň Milli Lideri, Türkmenistanyň Halk Maslahatynyň Başlygy Gahryman Arkadagymyzyň ýolbaşçylygynda türkmen wekiliýeti Günorta Koreýanyň «KEXIM» eksport-import banky, «K-SURE» Koreýa söwda ätiýaçlandyryş korporasiýasy, «Hyundai Engineering», «Hyundai Corporation», «LX International Corp.», «Omnisystem Co Ltd», Koreýa Respublikasynyň Deňiz enjamlary ylmy-barlag instituty, (KOMERI), «BS Medical», «Chungdo Pharm.», «Yuwonmeditech», «Olive Union», hem-de «Poonglim Pharmatech» lukmançylyk enjamlary öndürýän kompaniýalary, «SK Telecom» Günorta Koreýanyň telekommunikasiýa kompaniýasy, şeýle hem «LS Cable & System», «LG CNS», «STEALIEN», «ROVIGOS» ýaly kompaniýalaryň ýolbaşçylary hem-de wekilleri bilen duşuşyklar geçirildi. Ýeri gelende bellesek, döwletimize «Hyundai Motor Compani» zawodynda öndürilen «Hyundai» kysymly awtobuslar yzygiderli getirilýär. Şeýle-de, Koreýanyň «LG» «Samsung», «Daewoo» kompaniýalary «Awaza» mili syýahatçylyk zolagyndaky taslamalarda işjeňlik görkezdi.
Iki ýurduň ylym we bilim, medeniýet we syýahatçylyk babatda gatnaşyklar barha ösdürilýär. Dostlukly ýurduň alymlary, döredijilik wekilleri ýurdumyzda geçirilýän halkara forumlaryň we festiwallaryň işine yzygiderli gatnaşýarlar. 2014-nji ýylyň aprel aýynda Koreýa Respublikasynyň Seul şäherinde Magtymguly Pyragynyň doglan gününiň 290 ýyllygyna bagyşlanan ylmy konferensiýa geçirildi. Aşgabatda şanly sene mynasybetli şahyryň goşgular ýygyndysynyň koreý dilinde neşir edilen kitabynyň tanyşdyrylyş dabarasynyň geçirilmegi baýramçylyk çäreleriniň özboluşly dowamyny alamatlandyrdy.
2023-nji ýylyň 3-5-nji noýabrynda Aşgabatda Koreýanyň Medeniýet hepdeligi geçiriler. Koreýa Medeniýet hepdeliginiň çäklerinde Türkmenistanyň Magtymguly adyndaky sazly drama teatrynda aýdym-sazly konsert bolar. Koreýa Respublikasynyň «ONDO» topary meşhur K-Pop aýdymlary bilen birlikde, dürli koreý aýdymlaryny ýerine ýetirer.
Bu çärä gatnaşyjylaryň arasynda diplomatik korpusyň, halkara guramalaryň, köpçülikleýin habar beriş serişdeleriniň wekilleri, koreý medeniýetiniň köp sanly muşdaklary we paýtagtymyzyň myhmanlary bolar.
Aýmyrat MUHAMOW,
Türkmenistanyň Daşary işler ministrliginiň
Halkara gatnaşyklary institutynyň
Halkara ykdysady gatnaşyklar hünäriniň I ýyl talyby.