Täze «iPhone» öňküsinden gymmat bolarmy?
Bu çaklama «Apple» kompaniýasynyň direktory Tim Kuk tarapyndan aýdylýar.
Ol «iPhone 15»-iň bahasynyň ýokarlanmagyny şu sebäpler bilen düşündirýär:
* 48 megapikselli esasy kamera eýe bolar;
* A17 prosessora eýe bolar we 3nm tehnoprosessory arkaly işläp çykarylar;
* ilkinji gezek «optic zoom» üçin periskop ornaşdyrylar.
Kompaniýanyň önümleriniň taryhyna göz aýlasak, 2017-nji ýyldan bäri, nyrhlaryň üýtgemän gelýänini görýäris. Ýadyňyzda bolsa şol ýyl «iPhone X» 999 amerikan dollar bilen müşderilerine gowşupdy. Häzir şu pula 6,1 dýuýmly «iPhone 14 Pro» satyn alyp bilýäris. Üstüne 100 amerikan dollaryny goşsak, «14 Pro Max»-yň eýesine öwrülýäris. Bu nesilden-nesle geçme «iPhone 6 Plus»-dan bäri dowam edip gelýär. Ýöne soňky nesilleriň täzelenmesiniň biraz gymmatlamagy sebäpli, «Apple» kompaniýasy beýleki ýurtlarda smartfonlaryň bahasyny birnäçe gezek ýokarlandyrdy. Aslynda, soňky nyrh ýokardyrma diňe «iPhone 14» seriýasy üçindi. Indi kompaniýa ABŞ-da nyrhy uzak wagtyň dowamynda üýtgewsiz ýagdaýda saklap bilmez. «iPhone 15»-den başlap, «Apple» smartfonlarynyň nyrhy diňe bir ýer eýelerinde däl, bütin dünýäde hem gymmatlar.
«TechRadar» portalynyň hünärmenleri geljekki «iPhone»-laryň nyrhynyň ýokarlanmagyny smartfonyň özüne düşýän gymmatynyň artmagy bilen düşündirýärler. «Iphone 14» bilen deňeşdirilende, geljekki nesliň esasy modellerini işläp çykarmak kompaniýa 12 göterim gymmat düşer. «Pro» modeliniň nyrhy bolsa geçen ýyla garanyňda, 20 göterim ýokarlanar. Eger «Apple» iň bolmanda, ABŞ-da «däp bolan nyrhy» saklap galanynda-da, millionlap dollar ýitgi çeker. Ýeterlik derejede wepaly müşderisi bolsa-da, kompaniýa bu ýagdaýa «göz ýumup» bilmeýär.
Nyrhlaryň 20 göterim ösüşini hasaba alsak, onda ähli modelleriň 100 amerikan dollar gymmatlamagyna garaşybermeli. Ýöne kompaniýa ýadyň mukdaryny köpeltmek bilen, müşderileriniň «gözüni baglap» biler. Häzir smartfon bazarynda 128 GB ýada eýe «iPhone 14» 799, 256 GB-lik görnüşi bolsa 899 amerikan dollaryndan satylýar. Tapawudy bary-ýogy 100 dollar. Eger «Apple» mekirlik edip, 128 GB ýada eýe smartfonyny «hatardan çykarsa», geljekki 256 GB-lik «iPhone 15» 899 dollardan başlar. Göräýmäge, nyrh ýokarlandyrma ýok ýalydyr, ýöne gelýän girdeji weli köpeler.
Ýeri gelende aýtsak, «Wall Street»-de 20 ýyldan bäri tehnologiýa analitigi bolup işleýän Daniel Aýwes hem «iPhone 15»-iň ortaça nyrhynyň ýokarlanjakdygyny çaklaýar. Ol bu barada «CNBC» teleýaýlymynyň wekillerine beren interwýusynda aýtdy.
Onuň pikirine görä, 128 GB-lik ýokary pikselli kameraly smartfon üçin ýeterlik däl. Eger geljekki nesliň ýady 256 GB-den başlasa, «iPhone 15 Pro» modeli edil häzirki «iPhone 14 Pro» ýaly 1099 amerikan dollardan başlar. Bu hilä «Apple» baş goşmaz, ýöne programma üpjünçiliginde bolup biläýjek ýagdaý. Şeýlelikde, geljekki nesil «Apple» smartfonlarynyň bazara öňkülerden gymmat girmek ähtimallygy juda ýokary. Şonuň üçin hem «Hiçden giç ýagşy» bolsa-da, «iPhone» almak üçin güýzüň gelmegine garaşmaň.
Jahantäç ÖWEZOWA,
Türkmenistanyň Daşary işler ministrliginiň
Halkara gatnaşyklary institutynyň
halkara žurnalistikasy hünäriniň 1-nji ýyl talyby, «Biznes reklama»