Sanly ulgamyň üstünlikleri
2024-nji ýylyň 6-njy iýulynda “Sanly bilim” hususy kärhanasynda USAID-yň Türkmenistandaky wekilhanasy bilen bilelikde CyberTM Hackathon bäsleşigi geçirildi. Oňa maý-iýul aýlarynyň dowamynda “Sanly bilim” hususy kärhanasynda ýokary we orta hünär okuw mekdepleriniň sanly ulgamy boýunça “Türkmenistanyň sanly bilim ulgamyny ösdürmegiň Konsepsiýasy we ony durmuşa geçirmegiň Meýilnamasynda”, “Türkmenistanda 2019-2025-nji ýyllarda sanly ykdysadyýeti ösdürmegiň Konsepsiýasynda” bellenen wezipeleri ýerine ýetirmek we goldaw bermek maksady bilen, maglumat tehnologiýasy we kiberhowpsuzlyk boýunça okuwlary okan mugallymlar we hünärmenler gatnaşdy.
Bäsleşigiň düzgünnamasyna laýyklykda, her toparda 6 adamdan ybarat bolan 6 topar bäsleşdi. Toparlar okuw sapaklaryna kybapdaş atlar bilen atlandyryldy: 1-nji topar - Cryptic knights; 2-nji topar Secure System; 3-nji topar Network Ninjas; 4-nji topar Cyber Shield; 5-nji topar Firewall fighters; 6-njy topar Cyber warriors. Bu bäsleşik 4 tapgyrdan ybarat bolup, olarda hüjümleriň ýerine ýetirilişi, goranylyşy, tor topologiýalarynyň düzülişi, goragy bilen bagly ýumuşlar tabşyryldy. Bäsleşik çekeleşikli we täsirli boldy.
Bu bäsleşige Türkmenistanyň Daşary işler ministrliginiň Halkara gatnaşyklary institutyndan hem mugallymlardyr hünärmenler gatnaşdylar. 1-nji toparda institutyň Sanly ulgamlar we kommunikasiýa bölüminiň esasy hünärmeni K.Ýowbagşyýew, 3-nji toparda institutyň Halkara ykdysady gatnaşyklary kafedrasynyň mugallymy M.Nepesow, 4-nji toparda institutyň Sanly ulgamlar we kommunikasiýa bölüminiň 1-nji derejeli inženeri S.Aşyrowa gatnaşyp, degişlilikde toparlaýyn 1-nji, 2-nji we 3-nji orunlary gazanmagy başardylar.
Bäsleşikde 1-nji, 2-nji we 3-nji orunlara mynasyp bolan toparlara bäsleşigiň guramaçylary tarapyndan “Sanly bilim” HK-synyň beýleki okuw sapaklaryna 70%, 50% we 30% göterim ýeňillikli kartlar we degişli sertifikatlar gowşuryldy. Biz hem institutymyzyň adyndan gatnaşyjylara sanly ulgam we kiberhowpsuzlyk ugrunda alyp barýan işlerinde uly üstünlikleri arzuw edýäris.
Amanmyrat MYRADOW,
Türkmenistanyň Daşary işler ministrliginiň
Halkara gatnaşyklary institutynyň
Halkara ykdysady gatnaşyklary kafedrasynyň öwreniji mugallymy.