Halkara bäsleşige badalga berildi
Düýn Türkmenistanyň Daşary işler ministrliginiň Halkara gatnaşyklary institutynda «Halkara gatnaşyklary: parahatçylyk dialogynyň medeniýeti» atly halkara bäsleşige dabaraly ýagdaýda badalga berildi. Daşary ýurtly talyplaryň we magistrleriň gatnaşmagynda ilkinji gezek geçirilýän bäsleşige gatnaşmak üçin Gazagystanyň, Gyrgyzystanyň, Täjigistanyň, Özbegistanyň, Eýranyň, Türkiýäniň, Azerbaýjanyň, Russiýanyň, Hytaýyň ýokary okuw mekdeplerinden wekiller paýtagtymyza geldiler. Bäsleşige ady agzalan döwletlerden 40-a golaý, ýurdumyzdan bolsa 200-den gowrak talyp we magistr gatnaşýar.
Türkmenistanyň Bilim ministrliginiň we Daşary işler ministrliginiň Halkara gatnaşyklary institutynyň bilelikde guramagynda geçirilýän bu bäsleşigiň maksady BMG-niň Baş Assambleýasynyň 78-nji sessiýasynda Türkmenistanyň başlangyjy boýunça kabul edilen «2025-nji ýyl — Halkara parahatçylyk we ynanyşmak ýyly» atly Kararnamadan gelip çykýan ýörelgeleri, halkara dialog medeniýetini ýaşlaryň arasynda giňden wagyz etmekden ybarat bolup, ol ýekebara we toparlaýyn görnüşde geçirilýär. Onuň emin agzalary ýurdumyzyň we bäsleşige gatnaşýan daşary ýurtlaryň ýokary okuw mekdepleriniň professor- mugallymlaryndan düzüldi.
Ýekebara görnüşde test boýunça sowallar, ýumuşlar we meseleler çözüler. Bäsleşigiň toparlaýyn tapgyrynda bolsa gatnaşyjylar toparlaýyn görnüşde ýumuşlary we meseleleri çözmekde özara bäsleşerler. Gatnaşyjylaryň bilelikdäki «breýn-ring» bäsleşigini hem geçirmek meýilleşdirilýär. Şunda 1 sagat 30 minut özara çekişmeler, jemleýji teklibi taýýarlamak, ylalaşmak we gutarnykly görnüşde hödürlemek üçin goşmaça 30 minut göz öňünde tutulýar. Bu tapgyryň esasy wezipesi halkara we sebit ýagdaýlarynyň derwaýys meselelerini seljermek bolup durýar.
Bäsleşigiň netijesi toplanan utuklaryň jemi boýunça kesgitleniler. Ýeňijiler altyn, kümüş we bürünç medallar, degişlilikde, 1-nji, 2-nji we 3-nji derejeli diplomlar, ýadygärlik sowgatlar bilen sylaglanylar.
— Häzirki wagtda türkmen-hytaý gatnaşyklary bilim ulgamynda hem işjeň ösdürilýär. Şunda halkara derejeli olimpiadalardyr maslahatlara möhüm orun degişli. Bu halkara bäsleşik hem talyplaryň bilimlerini artdyrmaga mümkinçilik berýär. Oňa hytaýly talyplaryň üçüsi wekilçilik edýär. Türkmenistanda ilkinji gezek bolýarys. Ýokary myhmansöýerlik Aşgabadyň gözelligi bilen utgaşyp, bizde unudylmajak täsirleri galdyrýar — diýip, Hytaýyň Halkara gatnaşyklar uniwersitetiniň professory Liu Ýin öz pikirlerini paýlaşdy.
Öz işini 25-nji maýda tamamlaýan halkara bäsleşigiň maksatnamasy dürli çäreleri öz içine alýar. Onuň çäklerinde daşary ýurtly myhmanlar üçin paýtagtymyzyň gözel künjeklerine, şol sanda muzeýlere, söwda we dynç alyş merkezlerine, «Magtymguly Pyragy» medeni-seýilgäh toplumyna gezelençler guralar.
Aýlar ATAJYKOWA,
Türkmenistanyň Daşary işler ministrliginiň
Halkara gatnaşyklary institutynyň
Halkara žurnalistikasy fakultetiniň talyby.