Garaşsyzlyk, Bitaraplyk — baky bagtymyz
«Garaşsyzlyk, Bitaraplyk - ösüşiň goşa ganaty» atly
çeper-publisistik makalalar bäsleşigine
Garaşsyzlyk, nähili uly, ajaýyp bagt. Eýsem öz eliň, öz ýakaň bolup ýaşamakdanam bir uly bagt bolarmy?! Taryhda ýetmişden gowrak döwlet guran, merdana, halal, mert, päk ahlakly türkmen halky bu beýik bagta niçe zamanlardan bäri garaşyp gelipdir. Nesilleriň agzybir, asuda, parahat ýaşamaklygy üçin merdana pederlerimiz jan aýaman göreşipdirler. Ine, 1991-nji ýylyň altyn güýzi, altyn harplar bilen V müň ýyllyk şanly taryhymyza beýik wakany ýazdy. Mähriban watanymyz «Garaşsyz Türkmenistan» diýen beýik ada mynasyp boldy!
Hazirki bagtyýar zamanamyzda şeýle uly bagta, hormatly ada mynasyp bolan türkmen ilimiz bu ýokary derejäni gözüniň göreji ýaly goraýar, oňa ýürekden buýsanýar. Ol buýsanjy bolsa, aýdymdyr-saz bilen, ajaýyp şygyrlar we eserler bilen, ýa-da diýarymyzyň ösüşlerine goşant goşýan, onuň at-abraýyny bütin dünýä içre beýgeldýän işleri etmek bilen açyp görkezýarler. Hawa, bu günki gün her bir türkmen şeýle beýik derejäni saklamak, Diýarymyzy has-da ösdürmek we rowaçlandyrmak üçin ýaşaýar. Çünki, Garaşsyzlyk diýen beýik derejäni gazananyňdan soň halkyň watançylyk ruhy has-da beýgelýär. Hawa, 1991-nji ýylyň altyn güýzünden soň Watanymyzyň taryhynda köp üýtgeşmeler boldy. Eziz Diýarymyz bedew bady bilen, dynuwsyz öňe barýar. Şu geçen şanly 30 ýylyň dowamyndaky özgerişlikleri sanasaň sogaby bar diýleni. Ýurdumynyň Daşary syýasatdaky tutýan orny, dünýä arenasyndaky at abraýy, içerki ösüşleri, ak paýtagtymyzyň, obadyr-şäherleriň has-da gözelleşmegi älemi haýrana goýýar. Elbetde, bu zatlaryň aňyrsynda, mukaddes Garaşsyzlygymyzyň mümkinçilikleri, parahat ýurdumyzyň alyp barýan Bitaraplyk syýasatynyň artykmaçlyklary bardyr.
Halkymyz eziz Diýarymyzyň senenamasyndaky iň şanly senäni, Garaşsyzlyk baýramyny ýokary derejede belleýär. Ýogsam näme? Şeýle beýik bagta niçe ýyllardan soň ýeten ilimiz bu günki gün öz begenjini, buýsanjyny içine sygdyryp bilmän, halkyň ähli şatlyk-şowhunyny jemläp uludan toý tutýar. Hut eziz Arkadagymyzyň gatnaşmagynda geçirilýän şanly ýöriş bolsa, bu baýramçylygyň esasy şowhunydyr. Goý, türkmen halkyna bu toýy ýeneki ýyllarda-da uly şatlyk-şowhun bilen, giň gerim bilen bellemeklik miýesser eýlesin!
Eziz Arkadagymyz, hormatly Prezidentimiz Gurbanguly Berdimuhamedowyň alyp barýan syýasaty we bimöçber aladalary netijesinde bu günki gün Diýarymyz ýokary ösüşlere beslenýär, her bir türkmen raýaty bolsa, özüni dünýädäki iň bagtly adam hasaplaýar. Biz, bagtly nesiller geljekde-de ýurdumyzyň şanly ösüşlerini dowam etdirmegiň arzuwynda ýaşaýarys! Goý, Garasyz, baky Bitarap Türkmenistan Watanymyzyň halkara arenasyndaky şan-şöhraty, abraý mertebesi mundan beýläk-de dowamat-dowam bolsun! Ähli türkmen ilimiň mukaddes, şanly Garaşsyzlyk baýramy gutly mübärek bolsun!
Didar ISLAMOW,
Türkmenistanyň Daşary işler ministrliginiň
Halkara gatnaşyklary institutynyň
Halkara žurnalistikasy fakultetiniň
II ýyl talyby.