Çagany ene süýdi bilen iýmitlendirmegiň bütindünýä hepdeligi
Çagany ene süýdi bilen iýmitlendirmegiň bütindünýä hepdeligi (World Breastfeeding Week) Bütindünýä saglygy goraýyş guramasynyň başlangyjy bilen her ýyl 1-7-nji awgust aralygynda geçirilýär. Onuň döredilmegine 1990-njy ýylda BSGG-niň Çagany ene süýdi bilen iýmitlendirmegi höweslendirmäge hem-de goldamaga gönükdirilen Innoçet jarnamasynyň kabul edilmegi sebäp bolýar.
Dünýäniň 170-den gowrak döwletinde Çagany ene süýdi bilen iýmitlendirmegiň bütindünýä hepdeligi giňden bellenilýär. Onuň esasy maksady - zenanlara ene süýdüniň çaganyň saglygyna nähili peýdalydygy barada habar bermekden, jemgyýetçilik köpçüligine ene süýdüniň çagany keselleriň köpüsinden gorap biljekdigini düşündirmekden ybaratdyr.
Mälim bolşy ýaly, Bütindünýä saglygy goraýyş guramasy çaganyň 6 aýa çenli diňe ene süýdi bilen iýmitlendirilmeginiň möhümdigini belleýär. Diňe şondan soň, goşmaça iýmitler bilen birlikde, çaga azyndan iki ýaşaýança, ene süýdüni kesmän bermegi maslahat berýär.
Ene süýdi – bäbek üçin diňe bir iň gowy iýmit bolman, eýsem, geljekde ýüze çykyp biläýjek dürli keselleriň öňüni almakda hem güýçli serişdedir. ÝUNISEF-iň maglumatlaryna görä, çagany ene süýdi bilen iýmitlendirmeklik bäş ýaşa çenli çagalaryň 820 müňüsiniň ömrüni halas edip biler. Çünki ene süýdi kesellerden goraýan antitelalara baýdyr. Ene süýdi bäbejikleriň beýnisiniň ösüşine ýardam edýär, ýokanç kesellerden goraýar, semremek howpuny azaldýar.
Türkmenistanda çagany ene süýdi bilen iýmitlendirmek meselesine aýratyn üns berilýär. Muňa aýdyň subutnama hökmünde ýurdumyzda çagany ene süýdi bilen iýmitlendirmegi goramak we goldamak boýunça milli maksatnamanyň ornaşdyrylmagyny bellemek bolar. Ony durmuşa geçirmek üçin Enäniň we çaganyň saglygyny goramak barada ylmy-kliniki merkeziň binýadynda Çagany ene süýdi bilen iýmitlendirmegi goramak we goldamak boýunça merkez döredildi.
Enäniň çagany dogry we sagdyn ösdürip ýetişdirmegi üçin hem biziň ýurdumyzda ähli mümkinçilikler döredilýär. Işleýän zenanlarymyza çagasy bellibir ösüş derejesine ýetýänçä tölegli zähmet rugsadynyň berilmegi, çaganyň ene süýdi bilen doly derejede üpjün edilmegine ýardam berýän ýeňillikleriň döredilmegi ata Watanymyzyň ýurdumyzyň geljegi bolan nesillerimiz üçin nähili uly alada edýändiginiň subutnamasydyr.
Mähriban HUDAÝGULYÝEWA,
Türkmenistanyň Daşary işler ministrliginiň
Halkara gatnaşyklary institutynyň talyby.